Governu liuhosi Ministru Administrasaun Estatál (MAE), Miguel Pereira de Carvalho, fó pose ba administradór Munisípiu Ataúro, Domingos Soares. Imajen/Mídia MAE.

DILI, 01 abríl 2022 (TATOLI)—Ministru Administrasaun Estatál (MAE), Miguel Pereira de Carvalho, hateten administradór munisípiu tenke asegura funsionamentu servisu administrasaun lokál Estadu nian iha munisípiu sira.

Notísia Relevante: Governu nomea Domingos Soares lidera munisípiu Ataúro

Governu liuhosi Ministru Administrasaun Estatál (MAE), Miguel Pereira de Carvalho, fó pose ba administradór Munisípiu Ataúro, Domingos Soares. Imajen/Mídia MAE.

“Tanba Administradór Munisípiu maka reprezentante Governu nian iha munisípiu no nia mak simu knar atu dirije administrasaun munisipál, hodi asegura normál funsionamentu ba servisu hirak iha administrasaun lokál Estadu nian iha munisípiu, hodi hatan liuhosi ninia atividade ba membru Governu responsável bá,” MAE hateten iha serimónia pose ba administradór Munisípiu Ataúro, liuhosi komunikadu ne’ebé Agência TATOLI asesu, sesta ne’e.

Tuir nia, reprezentante Governu nian iha nível munisipál maka Administradór Munisípiu Ataúro ne’ebé mak sei dirije no hala’o kompeténsia hotu ne’ebé Governu deskonsentra ona ba munisípiu sira.

Mandatu ida-ne’e bele mosu dezafiu boot maibé bele asegura katak servisu administrasaun públika ne’ebé deskonsentra ona ba munisípiu foun bele implementa hotu, hodi bele garante atu alkansa objetivu hosi desentralizasaun administrativa tuir Planu Estratéjiku Dezenvolvimentu Nasionál (PEDN) 2011-2030.

Notísia Relevante: Governu aprova Fundu Espesiál Dezenvolvimentu Ataúro

Atu garante PEDN mak garante dezenvolvimentu setór privadu iha área rurál, atu kria oportunidade sira ba partisipasaun demokrátika iha nível lokál, atu promove harii Estadu ida forte no atu asegura harii prestasaun servisu públiku ida efetivu, efisiente no ekuitativu liu.

Hafoin simu pose, Administradór Munisípiu Ataúro Domingos Soares ho nia espoza hasai retratu hamutuk ho Ministru no Vise-Mnistru Administrasaun Estatál, Miguel Pereira de Carvalho no Lino Torrezão de Jesus. Imajen/Mídia MAE.

Ho nune’e bele finansia programa no projetu hirak-ne’e, ne’ebé anuál no plurianuál, sosiu-ekonómiku no sustentabilidade ambientál no destina ba dezenvolve territóriu no populasaun Munisípiu Ataúro nian, mak aprova tiha ona iha Konsellu Ministru iha 30 marsu, artigu 15 Lei númeru 1/2022, loron 03 fulan-janeiru, kona-ba Orsamentu Jerál Estadu (OJE) 2022, Dekretu-Lei ne’ebé Kria Fundu Espesial Dezenvolvimentu ba Ataúro (FEDA).

Iha serimónia pose ne’e, MAE husu Administradór Munisípiu Ataúro katak ninia misaun mak atu organiza servisu sira iha administrasaun lokál nune’e, hodi koordena ho servisu sentrál administrasaun públika sira, bele garante katak prestasaun servisu públiku sira ba komunidade bele sai ekuitativa, efetiva no efisiente liu.

Ida-ne’e hanesan responsabilidade ida importante tebes ba moris sidadaun sira-nian iha munisípiu. Servisu no misaun ne’ebé nia simu ne’e, iha ejijénsia boot kona-ba sakrifísiu no dedikasaun, nune’e administradór tenke prontu atu simu responsabilidade no dezafiu sira.

Nomeasaun Administradór Munisípiu Ataúro ne’e hala’o liuhosi Rezolusaun Governu ba mandatu ida ho tinan tolu nian no bele renova fali mínimu dala ida ba perídu ida hanesan, liuhosi proposta membru Governu responsável ba administrasaun estatál, hafoin rona tiha Konsellu Konsultivu Munisipál no Grupu Tékniku Interministeriál ba Desentralizasaun Administrativa.

Iha iha tinan 2022 sai hanesan tinan istórika ida ba rai Ataúro, rai ne’ebé mak koñesidu ka hakerek iha karta no mapa ho naran “Pulau Kambing”

Tamba iha tinan ne’e liuhosi sirkuntansia administrativa ho primeiru eskalaun nian mak Ataúro hetan definisaun hanesan munisípiu ida iha rai Timor-Leste liuhosi Lei númeru 14/2021 ne’ebé hetan alterasaun daruak sai Lei númeru 11/2009 kona-ba Divizaun Administrativa Territóriu.

Notísia Relevante: MAE-Autoriedade Komunitária Ataúro diskute futuru instalasaun edifísiu

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here