Vise Ministru Saúde, Bonifácio dos Reis ‘Mau-Coli’ akompaña hosi Enkarregadu Negósiu Embaxada Estadu Unida Amérika, Tom Delay, lansa kampaña vasinasaun Covid-19 ba estudante Eskola Bázika Sentrál Beremau Memo, postu Administrativu Maliana, munisípiu Bobonaro. Imajen Tatoli/Sérgio da Cruz.

DILI, 30 marsu 2022 (TATOLI)— Diretora Servisu Saúde Munisípiu Dili, Agostinha  Segurado, informa hahú hosi implementasaun vasina Booster Pfizer  (doze datoluk) iha loron 04 janeiru too horisehik, sidadaun hanesan liña frente, idozu, ema ho moras króniku no populasaun sira  ne’ebé simu ona  imunizasaun hamutuk 20.000.

“Sidadaun hamutuk 20.000-resin iha munisípiu Dili mak simu ona vasina booster Pfizer ka doze datoluk.Ita mós kontinua loke dalan ba komunidade ne’ebé mak hakarak simu bele hakbesik aan ba sentru saúde sira,” Diretora SSM Dili ne’e hateten iha Xanana Sports Center-Dili,  kuarta ne’e ne’e.

Notísia relevante:Governu hahú implementa vasina doze datoluk ba liña frente

Maski nune’e, resposavél ne’e konsidera taxa partisipasaun sei menus, tan ne’e SSM Dili nafatin loke vasina doze datoluk iha sentru saúde sira no ekipa saúde halo nafatin atividade sensibilizasaun um aba uma atu komunidade sira partisipa imunizasaun ne’e.

“Daudaun ne’e, universitáriu sira hahú simu ona vasina doze datoluk liuliu Univerisdade da Paz simu ona iha semana kotuk ho estudante hamutuk 200-resin,” nia akresenta.

Ba labarik ho idade 12 to’o menus idade 18 ne’ebé simu vasina Pfizer doze dahuluk iha munisípiu Dili hamutuk 41.000.  Enkuantu vasina Pfizer doze dahuluk iha territóriu nasionál atinje ona 42,3% no doze daruak 18,5%.

Populasaun elijível tinan 18 ba leten, ne’ebe simu ona vasina to’o iha loron 30 marsu 2022, tuir sistema informasaun Saúde iha Ministériu Saúde,hanesan kumulativu 1ª doze iha Dili (89,3%) no kumulativu 2ª doze iha Dili (83,9%).

Nune’e mós, sidadaun iha territóriu nasionál ne’ebé simu ona vasina doze dahuluk iha Timor-Leste 85,6% no simu ona doze daruak 72,8%.

Daudaun ne’e, Timor-Leste rejista kazu detetadu pozitivu foun na’in-tolu, rekuperadu ida no kazu ativu 19.

Notísia relevante:COVID-19: kazu detetadu pozitivu na’in-tolu no ativu 19

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here