Sekertáriu Estadu Protesaun Sivíl, Joaquim José Gumão dos Reis Martins. Imajen Tatoli/Francisco Sony

DILI, 30 marsu 2022 (TATOLI)— Sekretáriu Estadu Protesaun Sivil (SEPS), kuarta ne’e, relata labarik ho naran Joaquim Freitas, idade 11, lakon vida iha Manleuana-Dili, kauza udan boot hodi rezulta inudasaun ne’ebé akontese,horisehik, iha tuku 17:00  Oras Timor-Leste.

“Ita seidauk rejista kompletu, maibé ita rejista ita nian alin mane ida ho idade 11, naran Joaquim Freitas, ne’ebé maka monu ka mout iha drainajen tanba kauza inundasaun iha área Manleuana,” Sekretariu Estadu Protesaun Sivil Joaquim Gusmõo ba jornalista sira hafoin reuniaun  Konsellu Ministru iha Palasiu Governu, kuarta ne’e.

Notísia relevante:Ema 14 lakon vida durante dezastre naturál iha janeiru-fevereiru 2022

Bainhira vítima ne’e mout iha drainajen, ekipa hosi Protesaun Sivil, ekipa Bombeiru Espesial Goi, Bombeiru munisipiu Dili, Seguransa Sivil, Jestaun Dezastre, Cruz Vermella Timor-Leste (CVTL), Polisia Nasionál Timor-Leste inklui Komunidade iha área refere halo operasaun buska no konsege hetan labarik nia mate-isin.

“Ita konsege hetan ita nia alin nia mate isin, kuaze metru 500 hosi fatin nia mout, ita ramata  operasaun buska ne’e iha 8:30 kalan. Nune’e ita entrega mate-isin ba família no ita apoia kedan umanitariu ba familia inklui kaixaun hosi Ministériu Solidaridade Sosiál no Inkluzasau,” nia informa.

Hanoin udan boot ne’e, SEPS mós identifika komunidade balun nia hela fatin no mós fatin públiku sira inklui Palasiu Prezidente ne’ebé afeta mós inundasaun, maibé ekipa bombeiru hamoos ona.

“Ita la halo evakuasaun ba ita nian vítima sira hanesan iha área Maskarinas nian, moru Universidade Dili (UNDIL) naksobu hodi afeta uma-kain neen, maibé família vítima lakohi bombeiru evakua sira, hanesan mós iha komunidade iha Tasi-Tolu,” nia akresenta.

SEPS seidauk iha dadus serteza  kona-ba família ka uma-kain hira mak afeita inundasaun ka bee tama uma tanba ekipa protesaun sivíl sei kontinua halo levatamentu.

SEPS mós komunika ona ba Ministériu Obra Públiku (MOP) atu normaliza estrada ne’ebé kotu iha área Manleu ba munisipiu Aileu.

Notísia relevante:Janeiru-fevereiru, Protesaun Sivil Viqueque rejista uma-kain 29 afetadu dezastre naturál

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here