Diretór Eskola ESJ 12 Novembru, Aniceto Pedro da Costa. Imajen TATOLI/Tomé Amado

DILI, 30 marsu 2022 (TATOLI)–Diretór Eskola Ensinu Sekundáriu Jerál (ESJ) 12 Novembru Becora, Aniceto Pedro da Costa, relata katak edifísiu foun rua ho sala aula neen ne’ebé tama programa projetu komunitáriu hosi Ministériu Edukasaun Juventude no Desportu (MEJD), daudaun ne’e hahú konstrui ona iha resintu eskola.

“Kustu ba konstrusaun hamutuk $132.000 resin. Ita-nia edifísiu foun rua ho sala aula neen ne’e ita konstrui ho medida metru 15×25, foin atinje 10% tanba ita foin maka konklui iha aliserse (fondasi),” Diretór informa ba Agência TATOLI, iha Eskola ESJ Becora, kuarta ne’e.

Notísia relevante: Eskola ESJ 12 Novembru Becora hahú konstrusaun sala aula neen

Tuir Responsável eskola ne’e, planu konstrusaun ba edifísiu foun ne’e sei to’o fulan-neen, hahú hosi janeiru to’o juñu 2022, tanba ne’e parte eskola kontinua esforsu atu konstrusaun ne’e labele hetan fallansu.

Prosesu konstrusaun ne’e rasik tenke la’o tuir prosedimentu normál, ne’ebé maka deside ona hosi Diresaun Nasionál Infraestrutura Eskolár (DNIE) hosi MEJD, kona-ba fundu ne’ebé eskola sira uza ba prosesu konstrusaun no reabilitasaun.

Hosi prosesu konstrusaun dahuluk hahú ho 25%, bainhira konklui ona eskola tenke submete relatóriu faze dahuluk nian ba ministériu, depois maka bele foti fali faze daruak 25%, no faze datoluk mós hanesan.

Enkuantu, konstrusaun ba faze dahaat nian, eskola bele foti de’it 15%, tanba bazeia ba akordu ne’ebé halo ona, 10% tenke husik nafatin iha konta bankária.

Kustu projetu ne’ebé Governu aloka ba planu konstrusaun eskola 16 ho sala aula 64 iha Dili liuhosi programa projetu komunitáriu ho montante $1.680,680,12.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here