Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (30/03). Imajen TATOLI/Francisco Sony

DILI, 30 marsu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova Projetu Deliberasaun, hodi rekoñese no saúda manifestasaun ba interese investimentu privadu iha setór telekomunikasaun sira, liuliu ba instalasaun kabu fibra ótika ba rede telekomunikasaun sira.

Projetu Deliberasaun ne’e aprezenta hosi Ministru Koordenadór Asuntu Ekonómiku (MKAE), Joaquim Amaral.

“Ne’e laiha ligasaun ho fibra otika ne’ebé mak sei mai hosi Austrália, ida-ne’e ketak, mai hosi parte norte, katak liuhosi tasi no mós liuhosi rai-laran,” Ministru Prezidénsia Konsellu Ministru interinu no atuál Ministru Finansa, Rui Augusto Gomes, relata hafoin reuniaun ezekutivu, iha Palásiu Governu.

Notísia relevante: Empreza haat submete ona proposta investimentu fibra óptika ba TradeInvest

Ho deliberasaun ne’e, KM define mós hanesan prioridade halo tramitasaun hosi órgaun no servisu administrasaun kompetente ba prosedimentu administrativu ne’ebé presiza ba konkretizasaun investimentu privadu nian iha setór telekomunikasaun tuir lei ne’ebé vigora iha Timor-Leste.

Durante ne’e iha parte telekomunikasaun dependénsia ba rede satélite, ne’ebé halo presu a’as husi tempu ba tempu aumenta, tanba ne’e maka Governu iha vontade tomak atu aselera implementasaun fibra ótika.

Kada tinan Governu selu satélite hamutuk millaun $120 no orsamentu ne’e hatodan tebes Orsamentu Jerál Estadu (OJE).

Daudaun ne’e, banda internet internasioál ne’ebé maka Timor-Leste iha ho kapasidade 6 Gigabyte/segundu, ne’ebé fahe ba populasaun iha territóriu tomak ne’ebé asesu ba internet liuhosi operadór Timor-Telecom, Telkomcel no Telemor.

Enkuantu, Governu liuhosi Ministériu Transporte no Komunikasaun (MTK) aluga bandwith ho kapasidade 200 megabyte/segundu hodi oferese ba instituisaun Estadu hamutuk 140.

Maski nune’e, Governu iha ona planu atu atualiza husi kapasidade 200 megabyte ba 1 Gigabyte, atubele ajuda bainhira seidauk iha rede fibra ótika kabu submarinu.

Governu prevee millaun $41,588 ba verba Fundu Infraestrutura (FI) iha OJE 2021 hodi halo akizisaun ekipamentu informátika kabu submarinu.

Antes ne’e, empreza internasionál na’in-20 mak antes ne’e konkorre ona prosesu aprovizionamentu konkursu públiku internasionál, hodi sosa no instala ekipamentu kabu submarinu fibra ótika, maibé ikus mai empreza haat hanesan SAKOM Timor-Leste, Metrolink, Moratelindo, no Telkomsel mak submete ona proposta ba TrandeInvest Timor-Leste, ne’ebé daudaun ekipa responsável sei analiza molok aprova.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here