Sea Games iha Vietname. Imajen/espesial

DILI, 29 marsu 2022 (TATOLI)— Governu liuhosi Sekretáriu Estadu Juventude no Desportu (SEJD) hamutuk ho Kómite Olímpiku Nasionál Timor -Leste (CONTL-sigla Portugés) ho Konfederasaun Desportiva Timor-Leste (CDTL-sigla Portugés) kontinua diskute preparasaun atleta-sira atu partisipa  SEA Games iha nasaun Vietname, fulan-maiu ne’e.

Biban ne’e, Diretora Desportu Nasional ba Alta Kompetisaun iha SEJD, Maria Luisa Monteiro, hateten enkontru ne’e atu haree preparasaun CDTL no CONTL nian ba atleta sira hosi modalidade hotu ba partisipa iha eventu internasionál ne’e.

“Enkontru parte tolu nian ne’e hodi haree preparasaun CDTL nian too iha ne’ebé no CONTL atu lori kontijente ne’e, oinsá mós CDTL nia haree ba modalidade ne’ebé mak atu ba partisipa iha eventu internasionál ne’e,” Diretora ne’e hateten Agência TATOLI iha edifisiu CONTL Dili, tersa ne’e.

Notísia relevante:SEJD ho Federasaun Desportiva diskute preparasaun TL ba SEA Games

Iha biban hanesan, Sekretáriu Jerál CONTL, Laurentino Guterres, hateten diskusaun ne’ebé sira hala’o atu hatun ou mantein nafatin númeru atleta hosi kada modalidade ou hasai tia federasaun balun tanba tetu orsamentu hosi Governu la sufisiente.

“Tuir kalendáriu ita ba partisipa iha SEA Games, maiun ne’e. Nune’e  ita iha ona preparasaun ne’ebé másimu, maibé haree ba orsamentu ne’ebé la sufisiente mak CDTL ho ami no Governu tuur hamutuk ko’alia atu hamenus númeru atleta balun ou kansela federasaun balun,” nia afirma.

Tanba tuir proposta ne’ebé hato’o hosi CDTL katak sei kansela federasaun rua hanesan Natasaun no Halterofelizmu, maibé seidauk iha desizaun finál hosi Governu.

“Bazeia ba reuniaun ita ho nasaun 10 seluk iha ASEAN ne’e federasaun Halterofelizmu ita mak hatama,  maibé ita mak hasai fali ne’e ladun di’ak, ida fali Natasaun ne’e modalidade ida ne’ebé kada tinan eventu sira internasionál,” nia akresenta.

Orsamentu ne’ebé SEJD aloka ba federasaun hamutuk ualu atu ba partisipa iha SEA Games ne’e hamutuk $200.000-resin.

Federasaun ne’ebé atu ba partisipa ne’e mak hanesan, Atletizmu, Taekwondo, Karate-do, Voleiból Praia, Futeból, Halterofelizmu, Boxe no Natasaun.

Entretantu, Prezidente Federasaun Natasaun Timor-Leste, Laurentino Guterres, hateten prontu simu desizaun hosi Governu atu kansela sira nia partisipasaun iha Sea Games tinan ne’e.

“Hanesan federasaun ida ami pronto kumpre no simu desizaun saida mak Governu foti dehan ami la ba mós di’ak, ami hakruk ba desizaun, maibé Governu mós tenke hatene Natasaun tenke ba partisipa atu prepara an hodi kompete iha Olimpyc 2024 iha Paris,” nia fó hanoin.

Atleta hosi modalidade Natasaun na’in-tolu mak hahú preparadu atu partisipa, maibé hein hela desizaun ikus hosi Governu bele autoriza ou labele.

Notísia relevante: CDTL observa modalidade Taekwondo iha prestasaun di’ak partisipa Sea Games

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here