Sekertáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Francisco Sony

DILI, 29 marsu 2022 (TATOLI)–Primeiru-Ministru (PM), Taur Matan Ruak, tersa ne’e, bolu Sekretáriu Estadu Komunikasaun Sosiál (SEKOMS), Merício Juvinal dos reis ‘Akara’, hodi fó orientasaun koopera ho meiu komunikasaun, liuliu Estadu hodi divulga programa Governu ne’ebé implementa ona.

“Primeiru-Ministru husu SEKOMS tau-atensaun ba imajen Governu, ne’ebé durante ne’e hetan ataka maka’as hosi entidade oioin, dehan Governu lahalo buat ida no la konsege atinje prioridade no seluk-tan, ne’e normál iha demokrasia sempre iha opozisaun no ema balun krítika,” Sekretáriu Estadu Akara hateten hafoin hasoru malu ho Xefe Governu iha Palásiu Governu.

Notísia relevante: SEKOMS lansa kampaña nasionál kombate hoax faze datoluk ba nivel munisípiu

Biban ne’e, PM fó hanoin mós ba SEKOMS ne’ebé responsável ba área komunikasaun atu konsolida serbisu.

“Tinan ida to’o tolu liubá ami konsege halo di’ak, agora konsolida fali iha tinan ida ho balun nia laran, ne’ebé mandatu VIII Governu atu ramata, nune’e bele hatudu ba públiku katak Governu konsege halo buat balun no prioridade balun konsege atinje,” nia akresenta.

Xefe Governu husu SEKOMS hamutuk ho meiu komunikasaun sira hodi hato’o informasaun loloos no kredível ba públiku.

“Ha’u simu orientasaun ida-ne’e, hanesan Sekretáriu Estadu Komunikasaun Sosiál atu kolabora ho meiu komunikasaun hotu, liuliu Estadu nian atu ajuda Governu hatutan rezultadu servisu ne’ebé iha no planu ne’ebé mak iha tinan ida ho balun mai atu halo tan, nune’e povu akompaña informasaun loloos no kredível,” nia tenik.

Nune’e, Akara hamutuk ho ekipa prontu koordena ho mídia Estadu atu fó informasaun loloos no kredível ba Governu, inklui knaar ida-ne’ebé atu publika hanesan atividade governativa hotu.

“Ita tenki hasae’e ritmu no hasa’e kualidade. Primeiru-Ministru hein hela ida-ne’e, agora besik tan eleisaun, propaganda negativu hasoru Governu sei maka’as no liafuan ne’ebé mak la tuir realidade mós sei sa’e maka’as. Entaun hanesan membru Governu ida ne’ebé mak responsável ba área komunikasaun sei esforsu maka’as hodi netraliza informasaun ladi’ak hasoru Governu,” membru ezekutivu ne’e kompromete.

Aleinde ne’e, Ministru Asuntu Parlamentár no Komunikasaun Sosiál (MAPKOMS) interinu ne’e rekoñese katak buat balun seidauk halo, maibé buat barak mós konsege halo.

“Entaun buat balun konsege halo durante ne’e, maibé Primeiru-Ministru husu tenki masimiza liután, ne’e tanba realidade ne’ebé ita hotu akompaña katak tempu kampaña ne’e ajitasaun propaganda nia ritmu sa’e maka’as, ne’ebé Governu sente ida-ne’e,” nia tenik.

Primeiru-Ministru mós orienta SEKOMS atu kontinua programa kombate lia falsa sira no husu atu halo kooperasaun di’ak ho responsável meiu komunikasaun hotu.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here