Vise Ministru Saúde, Bonifácio dos Reis ‘Mau-Coli’ akompaña hosi Enkarregadu Negósiu Embaxada Estadu Unida Amérika, Tom Delay, lansa kampaña vasinasaun Covid-19 ba estudante Eskola Bázika Sentrál Beremau Memo, postu Administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 29 marsu 2022 (TATOLI) – Vise Ministru Saúde, Bonifácio dos Reis ‘Maucoli’, tersa ne’e lansa kampaña vasinasaun “Covid-19 seguru” ba komunidade sira iha suku Tapo-memo, postu administrativu Maliana, munisípiu Bobonaro.

Vasina Covid-19 ne’ebé lansa mak hanesan, AstraZeneca doze dahuluk no daruak, Booster no vasina Pfizer ba labarik idade 12 ba to’o 17 ne’ebé hetan apoia hosi USAID ho ninia atividade ba sustentabilidade sistema saúde.

Programa “Covid-19 Seguru”, hanesan insiativa importante ida hodi haforsa Timor-Leste responde ba COVID-19 no projetu refere apoia hosi Estadu Unidu nia Ajénsia ba Dezenvolvimentu Internasionál (USAID) no implementa hosi Organizasaun Naun Governamental (ONG) lokál HAMNASA (Hamutuk Nasaun Saudável).

USAID nia Atividade ba sustentabilidade ba saúde ajudika ona fundu ho montante $320,000 ba HAMNASA to espanda assesu no distribusaun vasina COVID-19 ida-ne’ebé seguru, efeitu no justu.

Portantu  HAMNASA sei serbisu iha suku sira iha munisipiu haat hanesan Bobonaro, Ermera, Ainaro no Liquiçá), ne’ebé tuir relatóriu nasionál sira-nia taxa vasinasaun sei menus no fundu ‘COVID-19 seguru’ ne’e hanesan inisiativa ida hosi USAID hodi apoia Ministéri Saúde.

Vice Ministru Saúde, Bonifácio dos Reis Maucoli, afirma programa refere implementa atu redús númeru mortalidade iha munisípiu sira-ne’ebé persentajen vasinasaun seidauk atinje meta ne’ebé governu hakarak katak populasaun Timor-Leste 80% tenke simu hotu vasina.

“Ha’u lori Ministériu Saúde nia naran, enkoraja inan-aman sira atu soporta ita-nia oan sira hodi bele mai hetan vasina ba labarik sira, no ohin imi-ne’ebé simu ona atu sai testemuña atubele  fó motivasaun ba sira seluk atu habesik mai fasilidade saude,” nia katak.

Governante ne’e mos kongartula  no apresia ba governu Estudu Unida Amérika (EUA) ne’ebé mak sei kontinua fó apoia ba governu Timor-Leste atu kombate pandemia Covid-19 no hasa’e taxa kobertura vasina iha territóriu nasionál.

Enkarregadu Negósiu Emabaxada EUA iha Timor-Leste, Tom Daley, hateten apoiu kampaña vasinasaun ne’e parte ida hosi kontribuisaun EUA nian ho vasina Pfizer doze 200,000 liuhosi COVAX hodi proteje Timor-Leste husi COVID-19.

“Ohin ita marka tán pasu boot ida ba oin liuhosi kampaña vasinasaun ba labarik ho idade 12 ba leten iha Bobonaro, Timor-Leste bele kontinua sura ho apoiu Estadu Unidu nian iha pasu sira ba luta hasoru pandemia global ne’e,” nia hateten.

EUA adota abordajen abrajente ida atu hapara pandemia ne’e iha mundu tomak, apoia atu mitiga kauza hOsi COVID-19 ba ema no soSiedade no promove rekuperasaun globál. Dezde inísiu pandemia ne’e, EUA serbisu hamutuk ho Timor-Leste ho kontribuisaun vasina Pfizer ne’ebé seguru no efetivu doze 200,000 no millaun $5.9 resin ba apoia krítiku sira hodi luta hasoru COVID-19.

Sekretáriu Autoridade Munisípiu Bobonaro, João Fátima do Carmo, informa durante ne’e kooperasaun servisu ho autóridade lokál no entidade relevante sira la’o  ho di’ak tebes.

“Ami hanesan autoridade agradese governu EUA ho nia parseiru tomak ne’ebé mak apoia Governu Timor-Leste atu kombate pandemia ne’e, tanba ne’e hanesan autoridade munisípiu ami nafatin suporta programa vasinasaun kontra Covid-19,” nia katak.

Entertantu tuir dadus hosi Ministériu Saúde iha loron 28 fulan-marsu tinan ne’e taxa kobertura vasinasaun munisípiu Bobonaro kontinua okupa segundu lugár númeru persentajen kiik liuhosi munisípiu 11 ho totál doze dahuluk 79,8% no doze daruak foin atinje 57,7%.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here