Koodenadór Klínika Veteranu David Alex 'Dai-tula' Baucau, Leonel Guterres. Imajen TATOLI/Natalino Belo.

BAUCAU, 29 marsu 2022 (TATOLI) – Klínika Veteranu David Alex ‘Dai-tula’ ne’ebé lokaliza iha munisípiu Baucau rejista maioria veternu hamutuk na’in-383 mak sofre moras matan.

Koordenadór Klínika Veteranu David Alex ‘Dai-tula’ Baucau, Leonel Guterres hateten, klínika refere hahú lansa ba públiku iha fulan-novembru 2021 no iha fulan-dezembru to’o fulan-marsu 2022 kada loron rejista vizitante hamutuk ema na’in-40 ba leten.

“Ita-nia veteranu sira maioria idade 50 ba leten, sira-nia problema mak tensaun aas no pulmaun, tuir kedas raan midar no rins maibé númeru aas-liu mak problema matan no nehan,” Koordenadór Kínika Veteranu Baucau informa ba Agência Tatoli iha Vila Antiga, tersa ne’e.

Veteranu na’in-50 resin mak hala’o ona operasaun matan iha fulan-dezembru hosi tótal rejistrasaun na’in-117.

Alende ne’e, tipu moras seluk ne’ebé rejista iha klínika veteranu Baucau hanesan, problema nehan na’in-340, tensaun aas hamutuk 310, artritis 174, pulmaun króniku 71, gastiris 51, paralisis 21, rins 21, prostate 9, problema ruin haat no seluk hamutuk 214.

Veteranu ne’ebé hala’o ona tratamentu durante fulan-fevereiru hamutuk 254, komunidade jerál 187, kazu refere ba Hospital Nasionál Guido Valadares (HNGV) na’in-rua no refere ba Hospital Rejionál Eduardo Ximenes na’in-17.

“Moras sira-ne’e ligadu ho idade ita-nia veteranu sira tuir kondisaun idak-idak nian,” Leonel akresenta.

Enkuantu totál veteranu ne’ebé presiza kontinuasaun halo tratamentu ambulante iha postu Laga hamutuk na’in-20, Quelicai 21, Venilale 113, Vemase 22, Baucau vila 29 no Baguia 59 hamutuk hotu 264.

Nune’e veteranu ne’ebé hala’o ona operasaun iha fulan-fevereiru kompostu operasaun ki’ik na’in-rua no boot na’in-ida no ba oin sei planu hala’o operasaun tán pasiente veteranu hamutuk na’in-15.

Klínika veteranu menus ekipamentu nune’e halo koordenasaun ho HoREX liuhosi halo pedidu ezaminasaun laboratóriu hanesan raiu-xís (USG) no hala’o operasaun ba veteranu tuir oráriu ne’ebé prepara ona iha loron kinta kada semana.

Klínika refere menus rekursu umanu tanba iha de’it profesionál saúde na’in-rua hamutuk ho doutór espesialista na’in-ida no limitasaun ba transporte atu halo tratamentu ambulante ba veteranu sira iha postu administrativu.

Resposavél klínika hato’o pedidu liuhosi Konsellu Munisipál Kombatente Libertasaun Nasionál Baucau (CMCLN, sigla portugés) kona-ba difikuldade ne’ebé klínika hasoru atu nune’e governu buka solusaun.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here