Kandidatu prezidente periodu 2022-2027, Lere Anan Timur halo komferensia imprensa, iha pantai kelapa Dili, tersa 29/03. Imajen Tatoli/Egas Cristovão

DILI, 29 marsu 2022 (TATOLI)-Kandidatu Prezidente Repúblika, Lere Anan Timur, deklara maski hasoru malu ona Prezidente Partidu CNRT, Xanana Gusmão no Sekretariu Jerál Partidu FRETILIN, Mari Alkatiri, maibé seidauk bele foti desizaun atu fó apoiu ba kandidatu José Ramos Horta ka Francisco Guterres Lú Olo iha eleisaun prezidensiál segunda volta.

Kandidatu ho númeru sorteiu ualu ne’e, hetan votu iha eleisaun prezidensiál primeiru volta iha loron 19 fulan-marsu 2022 hamutuk 49.314 (7,6%).

Notísia Relevante :Lere sei foti dezisaun apoiu Horta-Lú Olo tuir povu nia interese

José Ramos Horta ho númeru sorteiu 16  ho votu 303.477 (46,6%), Francisco Guterres Lu-Olo  ho votu 144.282 (22,1%), Armanda Berta  dos Santos 56. 690 (8,7%), Mariano Assanami Lopes Sabino 47.334 (7,3%), Anacleto Bento Perreira 13. 205 (2,0%).  

Martinho Germano da Silva Gusmão 8.598 (1,3%), Hermes da Rosa Correia Barros 8.030 (1,2%), Maria Helena Lopes de Jesus Pires 5.430 (0,8%), Isabel da Costa Ferreira 4.219 (0,6%), Felizberto Araújo Duarte da Silva 2.709 (0,4%), Constancio da Costa Pinto ‘Terus’ ho votu 2.520 (0,4%), Rogerio Tiago de Fatima Lobato 2.050 (0,3%), Virgilio da Silva Guterres ‘ Lamukan’ 1.720 (0,3%),  Antero Bendito da Silva 1.562 (0,2%) no Maria Angela Freitas da Silva 711 (0,1)%.

“Iha sábadu liubá ha’u hasoru malu duni ho Sekretáriu  Jerál partidu FRETILIN, Mari Alkatiri hodi fó hatene atu ba hamrik hamutuk ho sira-na’in tolu  no hasoru mós hau-nia alin no maun Lú Olo. Maibé hau dehan seidauk deside tanba kolen semana rua nia laran  la’o kampaña  no apoiante ne’ebé apoiu  ha’u mai hosi partidu no organizasaun oioin,” Lere hateten ba jornalista sira liuhosi konferénsia imprensa iha sede Pantai Kelapa, tersa ne’e.

Nia konfesa durante hasoru malu ho Mari Alkatiri, Sekretáriu Jerál Partidu FRETILIN ne’e relata  kona-ba deliberasaun reuniaun CPN partidu FRETILIN nian hodi rekuñese Lere nu’udar komite sentrál FRETILIN segundu jerasaun.

“Foin dadaun CPN partidu FRETILIN toma ona deliberasaun kona-ba ha’u-nia estatutu ne’ebé rekoiñese katak nu’udar komite sentrál FRETILIN segundu jerasaun hosi konferénsia Maubai 03-08 marsu 1981. Ida ne’e ha’u agradese ba Sekretáriu Jerál FRETILIN, Mari Alkatiri, maibé hanoin katak antes la’os agora ho ida ne’e fiar Sekretáriu Jerál rai nafatin iha nia fuan hau FRETILIN nafatin,”Lere dehan.

Enkuantu, hasoru malu ho Xanana Gusmão, Lere informa sira-nain rua diskute kona-ba kestaun polítika rai-laran no rona opiniaun husi Xanana atu tetu didiak desizaun molok deklara sira-nia posizaun apoiu kandidatu ruma iha eleisaun segundu volta.

“Iha loron 19 abríl mak foin eleisaun segundu ronde ne’ebé sei lori tempu mak hau sei anunsia sai pozisaun apoiu se-se Lú Olo ka Ramos Horta nune’e sei sukat no estuda,”nia hateten.

Maibé Lere Anan Timur ninia posizaun maka hakarak atu fó apoiu ba kandidatu ne’ebé tau interese povu nian hodi promove dialogu, unidade nasionál, estabilidade, rekonsiliasaun, iha ukun labele sai opozisaun ba parte seluk para ho ódiu no vingansa, hako’ak lidér nasionál no ema hotu, labele kria impase polítika nune’e kria  estabilidade,  servisu hamutuk hodi dezenvolve  ita-nia rain.

Kandidatu Prezidente Repúblika periodu 2022-2027 ne’e kongratula kandidatu José Ramos Horta no Francisco Guterres Lú Olo tanba povu fó ona fiar atu kontinua ba iha eleisaun segundu volta.

“Imi mós iha responsabilidade ba povu ida ne’e hodi hala’o kampaña  ida ho di’ak hodi konsentra de’it atu alkansa  vizaun tinan lima oin mai. No Husu imi mantein diálogu no prátika polítika konduzivu ba  unidade, pás no estabilidade nune’e tinan lima oin mai  halo dezenvolvimentu no tranzisaun,”Nia hateten

Ba futuru, Jenerál reformadu ne’e sei buka tempu di’ak hodi hasoru malu ho Sekretariu Jerál partidu FRETILIN, Mari Alkatiri hodi esklarese duvidas balun ne’ebé liga ho desizaun kona-ba deliberasaun CPN nian.

Entretantu, rezultadu reuniaun CPN FRETILIN, foinlalais ne’e, hasai deliberasaun hodi rekoiñese militánsia kamarada Jeneral-reformadu, Lere Anan Timur, nu’udar  membru  komite  sentrál FRETILIN segunda jerasaun.

Entrega sertifikadu no kartaun militante, no konvida atu partisipa iha reuniaun  komite sentrál no mós reuniaun CPN hotu-hotu.

Deliberasaun ne’e hetan aprovasaun ho unanimidade, maibé ho kondisaun katak antes atu asina no publika, Sekretáriu Jerál sei hatudu ka konsulta uluk ho Lera Anan Timur.

Jornalista: Nelson de Sousa

Editór: Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here