DILI, 29 marsu 2022 (TATOLI)—Ministru Koordenadór Asuntu Ekonómiku (MKAE), Joaquim Amaral, hateten, Governu sei foti medida iha tempu oportunu relasiona ho folin nesesidade bázika sa’e iha merkadu nasionál iha semana ikus ne’e.
“Ita sei foti medida iha tempu oportunu, tanba ita mós sosa ona foos tonelada 5.000 hosi Vietname no agora iha dalan inklui programa Cesta Bázika mós semana oin mai ne’e sei halo lansamentu. Instrumentu sira ne’e hola parte hosi intervensaun Governu ba estabilizasaun merkadu no fó biban ba Governu atu akompaña evolusaun situasaun hodi hola medida ruma,” Ministru hateten, iha auditorium Ministériu Finansa, Aitarak-laran, tersa ne’e.
Notísia relevante: Foos importasaun tonelada 5.000 to’o iha inísiu abríl
Tuir governante ne’e, folin nesesidade bázika sa’e tuir kondisaun mundiál, ne’ebé afeta mós mai Timor-Leste nia ekonómia.
Biban ne’e, Ministru mós otimista liuhosi programa Cesa Bázika sei hasa’e produsaun ai-han iha rai-laran.
“Ha’u sente intervensaun iha programa Cesta Bázika sei ajuda komunidade ho kbiit menus asesu ai-han, nune’e bele hakma’an no bele hetan ai-han, tanba ne’e husik programa ne’e la’o no ita akompaña lai evolusaun. Situasaun krize ne’e mundu tomak hasoru,” membru Governu ne’e dehan.
Nia dehan, sasán folin sa’e la’ós ba kombustível de’it, maibé mós ba mina-sona hotu no la akontese iha Timor-Leste mesak, maibé iha nasaun barak tanba nasaun produtór ba mina agora hasoru hela situasaun COVID-19 no hetan efeitu hosi konflitu funu Rúsia no Ukránia.
“Entaun kadeia hetan perturbasaun no implika ba folin kombustível no mina-sona sa’e. Iha situasaun ne’e mensajen Governu nian ne’ebé bele husik hela ba komunidade mak uza hahán ho efisiente no kuidadu, tanba ita-nia nesesidade bázika sira barak mak ita importa hosi nasaun li’ur,” nia akresenta.
Notísia relevante: Timor-Leste ameasadu enfrenta menus mina-sona iha merkadu
Iha biban ne’e, Ministru apela ba empreza boot nasionál no internasionál ne’ebé durante ne’e importa sasán hodi mai fa’an fali iha Timor-Letse, tenke kontinua konsiénsia ba krize ne’e no labele halo espekulasaun presu hodi hetan lukru iha situasaun ne’e.
Jornalista : Arminda Fonseca
Editora : Julia Chatarina
