Estudante EBC Beremau iha suku Tapo-Memo, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 29 marsu 2022 (TATOLI) – Ensinu Bazíku Sentrál (EBC, sigla portugés) Beremau, suku Tapo-Memo, postu administrativu Maliana, munisípiu Bobonaro, daudaun ne’e enfrenta hela problema menus kadeira, meza no laiha profesór lian inglés atu hanorin estudante sira.

Diretór EBC Beremau, suku Tapo-Memo, Lamberto Leite, informa meza ho kadeira ne’ebé daudaun ne’e estudante sira utiliza hodi iha prosesu aprendizajen governu mak tau no hetan  mós apoia hosi Organizasaun Child Fund hamutuk 120 maibé la sufiente tanba estudante ho númeru ne’ebé mak boot.

Diretór EBC Beremau iha suku Tapo-Memo, postu administrativu Maliana, munisípiu Bobonaro, Lamberto Leite. Imajen Tatoli/Sérgio da Cruz.

“Meiu ne’ebé mak ami eskola foti mak kadeira ho meza sira-ne’e aat beibeik, maibé ami hadi’a fila-fali atu estudante sira bele tuir aprendizajen ho di’ak, dalaruma osan subsídiu nian mak liu oituan ami sosa rasik kadeira balu rai iha ami-nia edifisíu nune’e profesór sira tuur tanba la sufisiente,” nia informa Agência TATOLI,  iha nia kna’ar-fatin, Memo, tersa ne’e.

Kona-ba problema laiha profesór lian inglés, dirijente eskola ne’e dehan dezde estabelesimentu eskola refere iha duni profesór na’in-ida maibé iha fulan-outubru tinan 2021 desizaun servisu edukasaun munisípiu Bobonaro halo transferénsia ba fali eskola seluk to’o agora seidauk hetan subtituisaun profesór seluk.

Diretór ne’e halo ona proposta ba parte edukasaun Bobonaro atu koloka fali profesór foun ida ba iha eskola refere maibé to’o ohin loron seidauk hetan resposta.

“Entaun dalan di’ak ne’ebé ami foti mak halo enkontru ho inan-aman sira husu netik kontribuisaun atu ami kontrata profesór voluntáriu sira atubele hanorin estudante sira tanba ami lakohi sira antes ezame sira hetan matéria disiplina hotu la kompletu,” nia esplika.

Diretór ne’e husu ba Ministériu Edukasaun, Juventude no Desportu (MEJD) atu apoia kadeira hamutuk 400 no meza 200 no koloka fila-fali profesór lian inglés na’in ida hodi nune’e estudante sira bele hetan edukasaun ho di’ak hanesan mós estudante sira iha eskola seluk.

Tuir observasaun Agência Tatoli nota iha terrenu, eskola refere movimetasaun livre tantu ema la’o-ain, transporte públiku no  animál sira, tanba dezde estabelesimentu eskola refere seidauk iha moru protesaun.

Nune’e mos problema ida tán mak sala aula ida kuaze tinan barak ona estudante sira labele utiliza no abandona hela tanba bloku ne’ebé hada iha tinan hirak liubá monu hotu ona no halo animál hanesan bibi no fahi mak uza fali no komunidade balun laiha konsiénsia soe fo’er abiru iha fatin mamuk ne’e.

Eskola refere fahe ba unidade rua no unidade ida ho totál sala neen akumula estudante primeiru siklu to’o terseiru siklu, no unidade ida seluk hamutuk sala aula hitu de’it akumula estudante pre-sekundáriu.

Entretantu totál estudante eskola ne’e hosi primeiru-anu to’o nono-anu hamutuk 600-resin ho total profesór na’in-25 kompostu hosi profesór permanente 19, kontratadu na’in-neen no guarda na’in- ida.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here