Diretór Ezekutivu Centro Nacional Chega (CNC), Hugo Maria Fernandes. Imajen/Mídia CNC.

DILI, 28 marsu 2022 (TATOLI)-Diretór Ezekutivu Sentru Nasionál Chega (CNC-sigla portugés) Hugo Maria Fernandes, relata nia parte entrega ona uma memoria esperansa hamutuk haat ba sobrevivente sira iha Munisípiu Liquiça, Covalima no Ainaro.

“Iha semana kotuk to’o agora, ita entrega ona “Uma Memoria Esperansa” haat ba sobrevivente sira, hanesan iha Maubara, Nahaek, Suai no Mausiga,”nia dehan ba Agênsia Tatoli, iha CNC Balide Dili, segunda ne’e.   

Notísia relevante : CNC entrega xave “Uma Memória Esperansa” ba sobrevivente iha Nahaek

No daudaun ne’e, nia esplika sei falta tan uma hamutuk lima ne’ebé oras ne’e sei kontinua iha prosesu konstrusaun iha Atauro, Viqueque, Lautem no Baucau.

“Maibé, CNC nian uma uma lima (5) ne’ebé mak ami aloka orsamentu ne’e, hanesan uma ida ho orsamentu $15.000,” nia katak.

Maibé ba tinan ida ne’e, CNC koopera ona  ho Ministériu Administrasaun Estatál (MAE) liuhosi Programa Nasionál Dezenvolvimentu Suku (PNDS) atu enkaixa mós programa harii uma memoria esperansa ba sobrivente sira.

“Ami halo kooperasaun ida, hanesan ami hatama de’it lista ba MAE orsida MAE halo verifikasaun liuhosi programa PNDS, nune’e sira mak sei atribui fali uma ida ne’ebé sira bolu uma kbiit la’ek ba sobrevivente sira,” nia akresenta.

Tuir planu iha semana ida ne’e, Sentru Nasionál Chega sei submete lista sobrevivente hamutuk 500 ba Ministériu Administrasaun Estatál tanba hahú iha tinan 2022 ne’e, MAE sei harii uma kbiit laek  (UKL) 10 ba kada suku.

Nia hateten CNC ninia pedidu ba MAE  maka atu hatama mós programa harii “Uma Memoria Esperansa” ba sovrevivente sira iha programa harii uma kbiit laek (UKL).

Kona-ba kriteria harii uma ba sobrevivente sira, CNC sei entrega ba MAE atu deside tuir sira-nia mekanismu rasik. Maibé lista ne’ebé CNC haruka ona ba Ministériu Administrasaun Estatál ne’e maihosi sobrevivente violasaun diretu umanu ne’ebé luta ba libertasaun nasionál nian.

“Entaun, orsida ita sei kompleta malu, ne’ebé se la sala MAE atu harii uma hamutuk rihun haat (4) resin, se kooperasaun ne’e la’o di’ak sei hetan 400 ka 10% hosi uma UKL ni’an,” nia afirma.

Kona-bá orsamentu harii uma, Diretór Ezekutivu ne’e hateten, orsamentu harii uma ne’e mai hosi Ministériu Administrasaun Estatál, ne’ebé ho totál kuaze millaun $ 80.

Jornalista : Nelia Fernandes

Editór       : Agapito dos Santos

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here