DILI, 28 marsu 2022 (TATOLI)—Prezidente Tribunál Rekursu (PTR), Deolindo dos Santos, hateten Tribunál Rekursu no primeira instánsia kontinua servisu ho regulár ho forma di’ak liután atu bele redús kazu pendente sira.
Notísia Relevante: PJR relata krime eleitorál ba Xefe Estadu
“Ohin, enkontru ho Prezidente Repúblika hodi ko’alia kona-ba servisu Tribunál nian ne’ebé la’o ho regulár mezmu ho dezáfiu ki’ik balun, maibé la’o ho forma di’ak liu tán,” Deolindo dos Santos hateten ba jornalista sira hafoin enkontru ho Xefe Estadu, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, segunda ne’e.
Prezidente Tribunál Rekursu ne’e la esplika detallu dadus prosesu krime no sivíl iha Tribunál Rekursu no Tribunál primeira instánsia haat, maibé servisu ne’ebé Tribunál halo iha fulan hirak ne’e konsege redús kazu barak.
Hanesan uluk, nia dehan. iha difikuldade Tribunál Distritál Dili (TDD) boot tebes maibé agora iha mudansa redús prosesu sivíl kuaze 2000 tun ba 700-resin no prosesu krime iha 2000-resin ne’e redús 1000-resin.
“Ho indikasaun prosesu ne’ebé iha kuaze mudansa loos, nune’e kontinua ho forma di’ak liután,” nia hateten.
Durante sorumutu, Deolindo dos Santos, relata mós preparasaun parte konsellu nian haree ba implementasaun lei organizasaun judisiáriu foun ne’ebé tama vigór ona, nune’e kestaun tékniku halo oinsá servisu hamutuk ho órgaun kompetente hodi fó resposta lais liu tán.
Jornalista : Nelson de Sousa
Editór : Cancio Ximenes
