Diretór PNDS RAEOA, Sebastião Tanesi. Imajen Tatoli/Abílio Elo Nini.

OÉ-CUSSE, 28 marsu 2022 (TATOLI) – Ekipa Programa Nasionál Dezenvolvimentu Suku (PNDS), Rejiaun Administrativa Espesiál Oé-Cusse Ambeno (RAEOA), submete ona lista benefisiáriu ba projetu Uma Kbiit Laek (UKL) faze daruak hamutuk 168 ba  Ministériu Administrasaun Estatál (MAE) atu prepara ba faze implementasaun.

“Prosesu sosializasaun iha nível sub-rejiaun haat no suku 18 ba Uma Kbiit Laek faze daruak nian, ita remata ona iha fevereiru, lista finál benefisiáriu hamutuk 168, ita submete ona ba iha nasionál atu halo prosesu preparasaun implementasaun,” Diretór PNDS RAEOA, Sebastião Tanesi, dehan ba Agência Tatoli iha Palaban, Oé-Cusse, segunda ne’e

Nia informa, implementasaun projetu UKL faze daruak, laiha mudansa bazea de’it manuál matadalan PNDS nian, tanba prosesu sosializasuan iha nível suku envolve hotu autoridade komunitáriu, veteranu, ekipa jestaun suku, promotór saúde, Ofisiál Polísia Suku (OPS), mak durante ne’e sai verifikadór ba kondisaun uma no benefsiáriu sira.

Nia fó katak, planu atu halo lansamentu hatuur fatuk dahuluk iha Oé-Cusse sei akontese iha fulan-abríl tinan ne’e, tanba iha Oé-Cusse mínimu suku ida hetan uma sia (9), iha suku tolu mak hetan uma 10, suku ida maka hetan uma 12 tanba aldeia barak.

“Ami la’o-tuir matadalan PNDS nian, no tuir dekretu lei PNDS, entaun iha tempu badak ita sei halo prosesu balun, antes tama prosesu fíziku hanesan aprovizionamentu, movimentasaun traballadór,” nia katak.

Progresu UKL faze dahuluk iha Oé-Cusse atraza uitoan tanba kondisaun estrada no impaktu udan, iha unidade rua inaugura ona, hela unidade 34 maka sedauk, tanba dalan ba sub-rejiaun ladún di’ak nune’e progresu ba UKL faze dahuluk ba unidade 34 foin atinje 75%.

Entretantu, iha tinan fiskál 2021 Governu harii Uma Kbiit Laek hamutuk unidade-1.254 iha suku 424 iha teritóriu nasionál ho montante orsamentu hamutuk $25,000.000 ho kustu ba kada uma purvolta $14,000 to’o $17,000.

Purtantu, projetu Uma Kbiit Laek, ne’ebé konstrui komposta hosi modelu rua, modelu 48 m2, inklui kuartu tolu (3), sala vizíta ida (1) no dapúr ida (1), modelu 37 m2 inklui kuartu rua (2), sala vizíta ida (1) no dapúr ida (1).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here