Imajen/Media PR.

DILI, 28 marsu 2022 (TATOLI)—Parlamentu Nasionál, segunda ne’e liuhosi reuniaun plenária aprova projetu rezolusaun hodi fó solidariedade ba povu no Governu Ukránia.

“Rezultadu votasaun a-favór 44, kontra 0 no abstensaun 0. Nune’e, rezolusaun Parlamentu Nasionál nº 89A/V(4ª) aprovadu,” Prezidente Parlamentu Nasionál, Aniceto Longuinhos Guterres Lopes, deklara liuhosi sesaun plenária.

Tuir textu rezolusaun ne’ebé lee sai hosi Vise Sekretáriu Meza Parlamentu Nasionál, António Nobre, katak Parlamentu Timor-Leste husu komunidade internasionál hamutuk ho assembleia Jerál Nasaun Unida (ONU, siglá portugés) hodi haforsa kondenasaun kona-ba uza forsa hosi Rússia hasoru Ukránia.

Parlamentu TL manifesta mós profunda kondolénsia ba vítima sira no mós sira-ne’ebé sofre kauza tanba agresaun hosi Rúsia ba Ukránia no mós manifesta solidariedade ba povu no autoridade Ukránia, no louva sira-nia esforsu ho korajen tanba defende ona soberania nasaun no liberdade povu Ukránia.

Iha dokumentu projetu rezolusaun, deputadu sira husu ba Rúsia atu tur hamutuk hodi ko’alia no husu atu retira forsa militár iha territóriu Ukránia.

PN mós apela ba nasaun hotu iha mundu ho organizasaun internasionál no ajénsia espesífiku sira labele rekuñese alterasaun ba fronteira Ukránia ne’ebé hetan rekuñesimentu internasionál no abstein ba kualker asaun ka negosiasaun ne’ebé bele interpreta hanesan efeitu multiplikadór hamosu ódiu.

Parlamentu Timor-Leste espresa mós sira-nia preokupasaun ba situasaun umanitáriu iha Ukránia iha ne’ebé ema barak halai sai hosi nasaun, no númeru refujiadu ne’ebé presiza protesaun no apoiu urjente.

Deputadu sira louva abordajen ativa hosi Governu Polónia, Hungria, Roménia, Bulgária, Eslováquia no Moldávia ne’ebé mantein loké sira-nia fronteira no fornese meiu evakuasaun, abrigu, asisténsia emerjénsia no médika.

Husu parte ne’ebé envolve iha konflitu refere promove diplomasia no diálogu polítiku sai hanesan rezolusaun pasífika ba konflitu.

Husu ba Nasaun Unida atu koopera ho Sekretáriu Jerál ONU ba kompromisu inkondisional hodi defende multilateralizmu no kooperasaun internasionál ba pás mundiál no umanidade.

Ikus liu, deputadu sira husu ba Prezidente Parlamentu atu entrega rezolusaun ba Governu, BA Parlamentu Ukránia, asembleia federál Rússia no haruka ba Sekretáriu Jerál ONU.

Deputadu proponente ba projetu rezolusaun ne’e aprezenta hosi José Agostinho “Somoxo”, Maria Angelina Sarmento, Duarte Nunes no António de Sá Benevides.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here