Sekretáriu Estadu Terras no Propriedade, Mário Ximenes. Imajen TATOLI/Egas Cristovão

DILI, 28 marsu 2022 (TATOLI)—Sekretáriu Estadu Terra no Propriedade (SETP), Mário Ximenes, segunda ne’e, hasoru malu ho Primeiru-Ministru (PM), Taur Matan Ruak, hodi despede tanba la hetan ona fiar hosi superiór.

“Primeiru-Ministru bolu ha’u mai hodi klafirika katak tempu badak ha’u tenki husik ha’u-nia pozisaun hanesan membru Governu,” Mário Ximenes hateten ba jornalista sira hafoin hasoru Xefe Governu, iha rezidénsia PM, Farol.

Notísia relevante: PM Taur sei fó sai lista remodelasaun daruak

Governante ne’e konsidera pozisaun hanesan buat ida imprestadu, kuandu iha fiar tenki simu kuandu laiha ona fiar mós tenki prontu simu.

“Ha’u prontu simu desizaun ne’e, laiha tan kestaun ba ida-ne’e,” nia akresenta.

Maski nune’e, membru Governu hosi partidu Kmanek Haburas Undiade Nasionál Timor-Oan (KHUNTO) ne’e konsege presta ona servisu ba nasaun durante tinan-tolu fulan sia.

“Durante asume kargu, ha’u fó ha’u-nia prestasaun servisu tuir saida mak ha’u bele halo hodi kontribui ba nasaun, tuir ha’u-nia kbiit durante tinan-tolu fulan-sia. Ha’u-nia susesu ida maka durante VII Governu, rendimentu iha SETP millaun $2,8 ba kofre Estadu, maibé durante ha’u-nia mandatu ho situasaun COVID-19 no laiha estabilidade polítika konsege atinje hosi millaun $2,8 ba to’o millaun $4,3. Ida-ne’e susesu boot ba ha’u-nia mandatu,” nia akresenta.

Notísia relevante: SETP rekolla millaun $4,2 durante tinan-ida hosi arrendamentu rai Estadu

Mário haktuir, durante hasoru malu ho Xefe Governu, enkoraja nia hodi simu desizaun ne’e.

Antes ne’e, Primeiru-Ministru propoin ba Prezidente Repúblika no liuhosi Dekretu Prezidente Repúblika ezonera Ministru Obra Púbilka Salvador Eugênio Soares dos Reis Pires, Ministru Justisa Manuel Cárceres da Costa, Vise-Ministra Finansa Sara Lobo Brites no Sekretáriu Estadu ba Assuntu Kombatente Libertasaun Nasionál Gil da Costa Monteiro ‘Oan Soru’.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here