Koronel F-FDTL, Manuel Freitas ‘Maubuti’. Imajen TATOLI/Vitorino Lopes da Costa

VIQUEQUE, 28 marsu 2022 (TATOLI)–Koronel FALINTIL-Forsa Defeza Timor-Leste (F-FDTL), Manuel Freitas ‘Maubuti’ husu ba Ministériu Obra Públika (MOP) hodi hadi’a estrada liga bá fatin turizmu Weluli Manas (bee-manas lulik), ne’ebé lokaliza iha suku Waimori, postu Viqueque villa, munisípiu Viqueque hodi vizitante sira bele asesu.

“Ha’u husu MOP atu hadi’a ona estrada ne’ebé liga Weluli Manas, atu vizitante sira bele asesu. Fatin ne’e poténsia boot ba turizmu no agora dalan liga ba ne’ebá ladi’ak, oinsa maka ema bele asesu,” Koronel  Maubuti hateten ba Agência TATOLI, iha salaun administrasaun munisipál, tersa ne’e.

Notísia relevante: Estrada kilómetru 4 asesu ba Weluli Manas Viqueque ho kondisaun a’at

Daudaun ne’e dalan hosi suku Bibileo liga ba fatin turizmu Weluli Manas kuaze kilómetru 4 ho kondiasuan  grave tebes.

Nia dehan, fatin ne’e iha ona fasilidade, maibé presiza rezolve estrada no eletrisidade.

“Ha’u hanoin bainhira estrada di’ak ona, ema barak sei ba vizita fatin turizmu Weluli Manas,” nia akresenta.

Koronel Maubuti haktuir, fatin turizmu ne’e iha tempu okupasaun Indonézia hanesan mós subar-fatin armada rezisténsia sira no forsa armada sira  uza hodi hanas-an.

“Iha tempu okupasaun indonézia, ami  subar iha Weluli Manas ne’ebá. Maibé ohin loron dalan maka seidauk di’ak tanba ne’e ema seidauk asesu. Fatin  bee-manas sira hotu ha’u vizita ona, maibé Weluli Manas mak di’ak liu,” nia tenik.

Antes ne’e Administradór munisípiu Viqueque, Januário Soares ‘Bolly’, husu ba Institutu Jestasaun Ekipamnetu, Institutu Públiku (IGE, I.P, sigla portugés) hodi  hadi’a dalan liga ba Weluli Manas, maibé to’o agora institutu seidauk konsege mobiliza ekipamentu.

Konstrusaun foun ba fatin turizmu ne’e hahú iha tinan 2021, ho durasaun fulan-neen, liuhosi kolaborasaun entre Sekretaria Estadu Formasaun Profisionál no Empregu (SEFOPE) no Dom Bosco, ne’ebé tuir planu atu halo inaugurasaun iha loron 29 dezembru 2021, maibé seidauk konsege tanba kondisaun estrada la permite.

Fasilidade iha Weluli Manas iha pixina ba ema boot no labarik kiik, fatin deskansa ba vizitante, fatin troka, sanitária públika ida, mini kafetaria no mini merkadu. 

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here