Prezidente CDTL, Macario Sanches. Imajen/ Media CDTL

DILI, 28 marsu 2022 (TATOLI)— Konfederasaun Desportiva Timor-Leste (CDTL, sigla Portugés), segunda ne’e, hala’o reuniaun ho Federasaun Desportivu hamutuk 48 hodi diskute kampionatu nasionál no direitu ba asesu subsídiu hosi Governu Timor-Leste.

“Ami hala’o enkontru ona ho lideransa federasaun hotu tenke prepara an hodi hatan ba lei baze desportu no mós ba diploma ministeriál númeru 40/2020, atu nune’e federasaun hotu bele iha direitu atu assesu ba fundu ne’ebé Governu oferese hodi halo kampionatu nasionál, hetan subsídiu no seluk tan,” Prezidente CDTL, Macario Sanches, hateten ba Agência TATOLI iha Jináziu-Dili.

Daudaun ne’e, estrutura CDTLliuliu Departementu Dezenvolvimentu Desportivu servisu makas hela ho federasaun sira atubele lori desportu ba oin ho di’ak liután.

Federasaun 10-resin mak kompleta sira nia dokumentu no iha kondisaun hetan subsídiu hosi Governu hodi realiza kampionatu nasionál no atividade seluk tan, maibé restu hosi ne’e seidauk iha kondisaun no seidauk hetan fundu hosi Governu

Tanba ne’e, CDTL hahú servisu makas atu federasaun hotu bele hetan finansiamentu hosi Governu. Enkuantu federasaun 10-resin ne’ebé kada tinan hetan orsamentu hosi Governu mak hanesan, Atletizmu, Karate-do, Taekwondo, Futeból, Voleiból, Boxe, Halterfelizmu, Natasaun, Xadres, Basketból no seluk tan.

CDTL mós husu ona ba federasaun hotu atu prepara sira nia planu asaun anuál atu haree hodi federasaun sira bele prodús atleta sira ho kualidade di’ak.

“Ami haruka hela sira halo planu asaun anuál atu ami haree liuliu sira halo kampionatu nasionál dala-hira, kompete iha eventu nasionál, rejionál no internasionál hira, ida ne’e hatama hotu ba planu anuál hodi submete mai ami, maibé too ohin loron federasaun hamutuk 10 mak manda ona sira nian planu anuál mai ami, bainhira sira hatama hotu ona mai ami tetu hodi husu ba Sekretaria Estadu Juventude no Desportu (SEJD) bele atribui orsamentu ba sira,” dehan nian.

Federasaun hamutuk 48, kompostu Atletizmu, Aikido, Basketból, Badmintong, Boxe, Siklizmu, Criket, Corida da Cavalho, Futeból, Halterofelizmu, Judo, Karate-do, Kempo, Motosiklizmu, Natasaun, Netball, Silat, Saling, SKI, Tiru, Taekwondo, Tenis Kampo, Tenis Meza, Voleiból, Xadres, Whusu, Mhuathay, Sepaktakraw, Rama Hana, Hockey, Andeból, Teqball , Roller no seluk tan.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here