Ekipa PNDS ho Autoridade RAEOA foto hamutuk ho benefisiáriU UKL iha Sub-rejiaun Oésilo. Imajen Tatoli/ Abílio Elo Nini.

 OÉ-CUSSE, 28 marsu 2022 (TATOLI) – Benefisiáriu projetu Uma Kbiit Laek (UKL), Maria Pauf ho Leonardo Saco, hosi aldeia Saben suku Bobometo, sub-rejeiaun Oésilo, Rejiaun Administrativa Espesiál Oé-Cusse Ambeno (RAEOA), segunda ne’e ofisialmente simu ona uma hosi Estadu Timor-Leste, no deklara sei la fa’an no fó aluga ba públiku, maibé sei kuida hanesan rikusoin hosi jerasaun ba jerasaun.

Benefisiáriu Maria Pauf no Leonardo Saco, fó-sai deklarasaun ne’e liuhosi akta legal ida, iha ámbitu Programa Nasionál Dezenvolvimentu Suku (PNDS) hamutuk ho Autoridade RAEOA halo serimónia inaugurasaun.

“Nu’udar benefisiáriu hamutuk família tomak sente kontenti tebes, ohin Estadu Timor-Leste oferese ona rikusoin ne’e mai ami, ami na’in-rua deklara katak, ha’u sei utiliza no kuida uma ne’e ho didi’ak iha ha’u-nia moris tomak no ha’u-nia jerasaun sira tuir nesesidade família nian, daruak, ha’u ho ha’u-nia jerasaun (oan) sira sei la- fa’an uma ne’e ba ema seluk, datoluk, ha’u ho ha’u-nia jerasaun sira sei la-fó aluga uma ba ema seluk, no ikusliu ha’u ho ha’u-nia jerasaaun (oan) sira sei tau matan no halo manutensaun ba uma ne’e, tuir kbi’it ne’ebé ami iha,” nota kompromisu ne’ebé Agência Tatoli asesu iha ámbitu serimónia inaugurasaun ne’e.

Diretór Delegasaun PNDS RAEOA, Sebastião Tanesi, hatete, projetu Uma Kbiit Laek iha tinan fiskál 2021, Oé-Cusse hetan unidade 36 kobre ba suku 18, unidade haat (4) inaugura ona, rua iha suku Cunha, sub-rejiaun Pante Makasar no rua ohin iha suku Bobometo, sub-rejiaun Oésilo.

“Ha’u husu inan-aman sira, hametin unidade iha baze, uma hirak-ne’e la’ós hili malu tanba partidu ka família, maibé liuhosi prosesu naruk, parte hotu-hotu partisipa, hosi autoridade komunitáriu, veteranu, ekipa jestaun suku, juventude, no Ofisiál Polísia Suku mai hotu halo avaliasaun,” Sebastião Tanesi ko’alia iha serimónia ne’e

Xefe Gabinete Sekretáriu Rejionál ba Asuntu Administrasaun Estatál, António Seran, reprezenta autoridade RAEOA, fó parabens ba VIII Governu Konstitusionál, tanba kria polítika Uma Kbiit Laek, ba komunidade kbiit laek sira ita territóriu nasionál inklui Oé-Cusse.

“Prosesu ne’e la fásil, autoridade mós durante halo akompaña katak, tanba ne’e programa Governu sentrál nian, entaun autoridade iha obrigasaun atu kontribui tanba ne’e gasta osan Estadu tenke iha nia rezultadu, autoridade agradese no parabéns ba ekipa PNDS nia esforsu to’o susesu ba povu Oé-Cusse,” nia kongrtula.

Xefe suku Bobometo, José Elo, reprezenta autoridade komunitária no komunidade suku Bobometo, sente kontente no agradese ba Estadu Timor-Leste no ekipa implementadór hosi PNDS Oé-Cusse.

“Ha’u lori aldeia sia (9) no komunidade nia naran, agradese ba Estadu Timor-Leste, uluk ita terus ohin nu’udar ita tenke kontente, labele terus beibeik, prosesu hosi inísiu iha istoria malu deskonfia malu tanba suku tomak, ema na’in-rua de’it mak hetan, maibé liuhosi koordenasaun esforsu ekipa PNDS halo ohin ita hetan rezultadu ona,” autoridade lokál ne’e agradese.

Orsamentu ba Uma Kbiit Laek unidade rua ne’e, gasto rihun $34,00 hodi konstrui fasilidade mak hanesan uma ida ho medida 7×6 ho kuartu toba tolu (3), sala vizíta ida (1), beranda ida (1), rampa oin kotuk, dapur ida (1) no haris fatin ida (1).

Entretantu, iha tinan fiskál 2021 Governu harii Uma Kbiit Laek hamutuk unidade 1.254 iha suku 424 iha territóriu nasionál ho montante orsamentu $25,000.000 ho kustu ba kada uma purvolta $14,000 to’o $17,000.

Projetu Uma Kbiit Laek, ne’ebé konstrui komposta hosi modelu rua, modelu 48 m2, inklui kuartu tolu (3), sala vizíta ida (1) no dapúr ida (1), modelu 37 m2 inklui kuartu rua (2), sala vizíta ida (1) no dapúr ida (1).

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here