Xefi Suku Fatulia, Postu-Administrativu Venilale, Munisípiu Baucau, Angelo Moises Pereira. Imajen TATOLI/Natalino Belo.

BAUCAU, 28 marsu 2022 (TATOLI) – Benefisiáriu na’in-sia sei hetan subsídiu Uma Kbiit Laek (UKL) tinan ne’e hosi Programa Nasionál Dezenvolvementu Suku (PNDS) iha suku Fatulia, postu administrativu Venilale, Munisípiu Baucau.

Xefe suku Fatulia, Angelo Moises Pereira, hateten tinan-ne’e PNDS liuhosi UKL hahú ona verifikasaun ka levantamentu dadus ba benefisiáriu sira antes hahú konstrusaun UKL iha aldeia tolu kompostu kada aldeia uma tolu hanesan Uitobu’uno, Uatulia-ana no Ossuake.

“Benefiasiru sira balun inan faluk, maibé kondisaun família mukit tebes, nune’e ekipa tún verifika haree kondisaun reál hodi deside prioridade ba benefisiáriu na’in-sia ba programa UKL tinan-ne’e,” Xefe suku Fatulia ko’alia iha Vila Nova, segunda ne’e.

Ekipa verifikadór konsidera kandidatu benefisiáriu na’in-sia ne’e prienxe ona kritéria tuir matadalan PNDS ne’ebé kategoriza nu’udar família mukit.

Prosesu tomak tama ona iha faze levantamentu rai, hein fó-sai kuotasaun no kompañia ne’ebé manán sei fornese materiál atu implementa programa ne’e iha fulan-abríl.

Benefisiáriu na’in-sia sei aloka orsamentu hamutuk $ 159.318, kustu infraestrutura hamutuk $ 153.306 no kustu operasionál $ 6.012.

Entertantu, autoridade munisipál Baucau hetan alokasaun orsamentu hosi programa UKL hamutuk tokon $1.8. Hosi totál ne’e atu finansia ba atividade fíziku hamutuk tokon $1.734 ba suku 34 no despeza operasional rihun $68.

Jornalista    : Natalino Belo

Editór           : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here