Dili Atauro

DILI, 28 marsu 2022 (TATOLI) – Vise Ministru Administrasaun Estatál (MAE), Lino de Jesus Torrezão, hateten Administradór Munisípiu Ataúro sei simu Tomada Posse iha loron 01 abríl.

“Posse ba Administradór Munisípiu Ataúro sei realiza iha 01 abríl 2022”, Torrezão hateten ba Agência TATOLI, via WhatsApp, ohin.

Lino rekorda, antes ne’e MAE aprezenta kandidatu na’in tolu kompostu hosi mane rua no feto ida ba Konsellu Ministru maibé deside Domingos Soares mak sai administradór ba Ataúro.

Iha loron 09 marsu liubá Governu liuhosi reuniaun Konsellu Ministru, aprova Projetu Rezolusaun Governu, ba nomeasaun Domingos Soares hodi asume kargu Administradór munisípiu Ataúro, iha rejime komisaun servisu. Proposta ne’e aprezenta hosi Ministru Administrasaun Estatál ( MAE ), Miguel Perreira de Carvalho.

“Nune’e iha rejime komisaun servisu, mandatu administrador munisipál ne’e ba períodu tinan tolu, sura hosi loron simu pose. Nune’e, mandatu ne’e bele renova dala-rua”, Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Enkuantu, Prezidente no Administradór hatuur ona iha dekretu-lei númeru 3/2016 ne’ebé aprova estatutu autoridade ho administrasaun munisipál, no grupu traballu tékniku interministeriál.

Dekreu-lei ne’e hodi estabelese administrasaun munisipál Ataúro ho ninia kompeténsia sira hanesan munisípiu sira seluk, maibé iha kompeténsia adisionál ne’ebé iha área ambientál no turizmu komunitáriu.

Iha loron 31 maiu 2021, Parlamentu Nasionál aprova Proposta-Lei Divizaun Administrativa Territóriu ho unanimidade, nune’e, Loré no Hatulia B sai postu administrativu foun no Ataúro sai munisípiu foun iha 01 janeiru 2022.

Iha tinan 2022, Governu prevee orsamentu ba Ataúro nu’udar munisípiu foun, ho montante $ 2.508.100, kompostu hosi saláriu no vensimentu $ 484.932, bens no servisu $ 990.797, kapitál menór $ 728.100, kapitál. Dezenvolvimentu laiha, no transferénsia públika $ 304.271.

Jornalista : Osória Marques

Editór : Zezito Silva

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here