Jerente empreza Timor Resources, Filomeno de Andrade. Imajen TATOLI/Celestina Teles

COVALIMA, 27 marsu 2022 (TATOLI)–Jerente empreza Timor Resources, Filomeno de Andrade, informa, provizóriu hapara atividade  perfurasaun iha posu Liurai, iha aldeia Sanfuk, suku Camanasa, postu administrativu Suai villa, munisípiu Covalima, tanba sei halo estudu jeolójiku.

“Ami halo perfurasaun to’o ona metru 1.600, enkuantu bazeia ba alvu metru 1.440 de’it, maibé ami halo perfurasaun liu tanba iha indikasaun di’ak tebes. Agora provizóriu taka tanba sei halo estudu jeolójiku atu hakle’an liután, posu Lafaek iha parte suku labarai ami planu sei hahú fali iha fulan-outubru,” Jerente empreza hateten iha Komandu Polísia Nasionál Timor-Leste (PNTL) Covalima, Santa Rosa, domingu ne’e. 

Notísia relevante: Fulan ne’e, Timor Resources fura tan mina-matan iha posu Liurai

Timor Resources sei halo perfurasaun iha posu Rusa, iha munisípiu Manufahi, hafoin kontinua halo perfurasaun iha posu Liurai tanba antes ne’e hatudu iha indikasaun di’ak. 

“Perfursaun iha posu Liurai hatudu prospetiva di’ak ba oin, tanba ne’e sei kontinua nafatin hodi haree tuir rezultadu. Ita hetan iha fatin haat mak hanesan ne’e tanba perfurasaun to’o metru 900 hetan ona gás, ne’ebé hatudu indikasaun katak mina iha. Perfurasaun hodi konfirma ho rezultadu ne’ebé oras ne’e daudaun ami iha espetativa maka’as,” nia relata. 

Tuir Jerente empreza ne’e, ekipa téknika sei kontinua halo perfurasaun oituan, tanba  perfurasaun oras ne’e daudaun sei taka no hein iha tempu oin sei kontinua hala’o perfurasaun iha posu Liurai.

“Ami sei para iha fulan balun ho razaun tanba sei halo estudu kle’an liután no halo hotu balansu, tanba atividade perfurasaun Feto Kmaus nian, jeolojista sira kontinua  sei halo estudu kle’an liután,” nia tenik. 

Notísia relevante: Governu la hasai osan ba perfurasaun posu Feto Kmaus

Aleinde ne’e, Timor Resources  sei halo manutensaun mákina perfurasaun hodi atividade perfurasaun di’ak liután.

Antes ne’e, iha loron 12 dezembru 2021, ekipa téknika mobiliza ekipamentu perfurasaun ba posu Liurai hodi hahú atividade.

Jornalista : Celestina Teles

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here