Komandante PNTL munisípiu Covalima, Superintendente Basílio de Jesus, halo pasa revista formatura ba membru, iha ámbitu selebrasaun aniversáriu PNTL ba da-XXII, iha Komandu PNTL Covalima, Santa Rosa, domingu (27/03). Imajen TATOLI/Celestina Teles

COVALIMA, 27 marsu 2022 (TATOLI)—Komandante Polísia Nasionál Timor-Leste (PNTL) Covalima, Superintendente Basílio de Jesus,  husu membru hotu atu serví povu ho profisionál liuhosi asaun atendimentu sidadaun iha baze.

Lia hirak ne’e hato’o iha aniversáriu PNTL ba da-XXII ho tema ‘PNTL prontu hametin lei no orden ho imparsiál ho neutrál hodi prevene krime, iha Estadu Direitu Demokrátiku’.

“Fó hanoin ba ita-hotu, ho idade ne’ebé aumenta desde tinan 2001 to’o 2022, Polísia nia prezensa iha nasaun ida-ne’e obriga ita hakarak ka lakoi  tenke profisionál liuhosi asaun atendimentu iha baze, nakonu ho sentidu pasiénsia, no amizade,” Komandante PNTL Covalima hato’o liuhosi nia diskursu, iha Komandu PNTL Covalima, Santa Rosa, Covalima, domingu ne’e.

Notísia relevante: Komandante PNTL husu membru sai forte fó seguransa ba povu-nasaun

Nia dehan, Polísia la’ós serví inimigu maibé polísia  serví amigu, no inimigu ho sidadaun sira-nia hahalok bainhira sira halo asaun krime tanba polísia hala’o lei no orden.

Aleinde ne’e, Polísia sei la kria separasaun entre komunidade, joven, estudante ho Polísia, maibé sei kria parseiru di’ak no amizade ho instituisaun Estadu ne’ebé eziste iha covalima liuhosi serví sidadaun nakonu ho dignidade.

Komandante PNTL munisípiu Covalima, Superintendente Basílio de Jesus, hato’o diskursu iha ámbitu selebrasaun aniversáriu PNTL ba da-XXII, iha Komandu PNTL Covalima, Santa Rosa, domingu (27/03). Imajen TATOLI/Celestina Teles

“Serví povu labele sukat ita nia kolen, maibé kalan no loron, kualker tempu, ita polísia tenke serví sira iha fatin ne’ebé ita hela bá, maski la’ós hosi oras servisu. Ha’u dehan ba ita-bo’ot sira, atu tuir konseitu polisiál, di’ak liu polísia mate na’in-10 duké joven no sidadaun ida mate. Ejize  ita atu salva sidadaun iha kualkér situasaun no defende sidadaun livre hosi kualkér ameasa,” nia dehan.

Ho nune’e, tuir Komandante PNTL Covalima, ezisténsia PNTL iha tinan 22 ne’e, hanesan tempu ona atu sai profisionál liután, sai liman kroat hodi defende povu, la’ós liman kroat hodi  fó ameasa ho tendénsia baku tebe no halo mate.

Bazeia ba Konstituisaun artigu 147 kona-ba ‘Polísia ho forsa seguransa’, Polísia tenke defende legalidade demokrátika no garante seguransa interna ba sidadaun hotu no la inklina ba partidu, halo prevensaun krime tenke bazeia ba respeitu direitu umanu no lei maka determina regra no regulamentu  ba Polísia, forsa seguransa no forsa sira seluk.

Iha seremónia selebrasaun aniversáriu PNTL iha Covalima, partisipa hosi Administradór munisípiu Covalima no postu Suai villa, Diretór servisu munisipál, Organizasaun Naun Governamentál inklui líder komunitária sira.

Jornalista : Celestina Teles

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here