Primeiru-Ministru no Ministru Interiór, Taur Matan Ruak, entrega sertifikadu apresiasaun ba emprezáriu timor-oan, Salvador do Rego Martins Soriano Henrique ‘Mauhoka’, iha ámbitu aniversáriu PNTL ba da-XXII, iha Sentru Formasaun PNTL, Comoro, domingu (27/03). Imajen TATOLI/Francisco Sony

DILI, 27 marsu 2022 (TATOLI)–Governu liuhosi Primeiru-Ministru no Ministru Interiór, Taur Matan Ruak, entrega sertifikadu apresiasaun ba emprezáriu timor-oan, Salvador do Rego Martins Soriano Henrique ‘Mauhoka’, ne’ebé antes ne’e ho voluntáriu harii Postu Polísia Tránzitu.

“Hanesan timor-oan, kontribui ba ha’u-nia rain la’ós ho intensaun atu hetan sertifikadu hanesan ne’e, maibé ohin loron Governu fó mai ona, ha’u agradese, postu sira ne’e ha’u harii hanesan kontribuisaun ba ita-nia nasaun, ha’u halo ho ha’u-nia osan rasik,” Emprezáriu timor-oan ne’e hateten ba jornalista sira iha Sentru Formasaun Polísia, Comoro, domingu ne’e.

Notísia relevante: PM inaugura postu polísia tránzitu ne’ebé konstrui hosi Mauhoka

Diretór Kompañia Rudal, Salvador do Rego Martins Soriano Henrique ‘Mauhoka’. Imajen TATOLI/Francisco Sony

Konaba-ba kustu harii postu Polísia Tránzitu, atuál Diretór Kompañia Rudal ne’e prefere la fó sai montante ba públiku.

“Totál osan hira mak ha’u gasta ne’e la presiza ha’u atu ko’alia sai, maibé osan uituan mak ha’u gasta ba postu sira ne’e. Ida-ne’e hanesan ha’u-nia kontribuisaun ba nasaun,” nia dehan.

Iha loron 13 outubru 2021, Ministru Interiór, Taur Matan Ruak, akompaña ho Komandante Jerál PNTL, Komisáriu Fautino da Costa, inaugura postu Polísia Tránzitu, ne’ebé iha área rotunda Bairro Pité.

Total postu Polísia Tránzitu ne’ebé mak Mauhoka halo hamutuk 15, kompostu hosi 14 iha kapitál Dili iha área Bairro Pité, Colmera, Hotel Timor oin no Terminál Becora no ida iha Kaitehu munisípiu Liquiçá ba Polísia sira halo treinamentu.

Jornalista : Hortencio Sanchez

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here