Primeiru-Ministru, Taur Matan Ruak. Imajen Tatoli/Egas Cristóvão

DILI, 27 marsu 2022 (TATOLI)–Prezidente Partidu Libertasaun Populár (PLP), Taur Matan Ruak, deside hamutuk ho nia militante sira inklui partidu seluk ne’ebé forma VIII Governu Konstitusionál, atu fó apoiu ba Kandidatu Prezidente Repúblika (PR), Francisco Guteres ‘Lú Olo’ iha eleisaun segunda volta.

Kontráriu ho nia espoza, Isabel da Costa Ferreira, ne’ebé hanesan Kandidatu PR ida ne’ebé la pasa ba segunda volta, deside apoiu Kandidatu PR, José Ramos Horta.

“Imi hotu haree, iha ha’u-nia família hili dalan la hanesan, relijiaun de’it mós ami idaidak hili balun protestante no balun katólika, partidu mós hanesan balun FRETILIN, balun PLP no balun seluk, ne’ebé demokrasia ne’e sai hosi ami-nia uma-laran. Ida-ne’e mak demokrasia loloos,” Taur hateten ba jornalista sira iha salaun Canossa, Has-laran Manleuana, domingu ne’e.

Notísia relevante: Isabel Ferreira deside apoiu Ramos Horta ba eleisaun segunda volta

Nia dehan, Partidu Libertasaun Populár (PLP), Frente Revolusionária do Timor-Leste Independente (FRETILIN), Kmanek Haburas Unidade Timor Oan (KHUNTO) kontinua la’o hamutuk hodi apoiu kandidatura Lú Olo atu hetan vitória iha segunda volta.

“Ami-nia hamutuk hodi apoiu Lú Olo ba segunda volta ne’e iha tahap rua, maski planu ida de’it, ami hanesan hametin ami-nia ukun hamutuk to’o tinan 2023, atu atinje ida-ne’e mak ami hamutuk lori ami-nia kandidatura Lú Olo ba tuur dala-ida tan hanesan Prezidente Repúblika,” Taur dehan.

Ho nune’e, mehi PLP iha tinan 2023 atu ukun hamutuk ho partidu FRETILIN no KHUNTO, konsentra liu ba pontu tolu.

Notísia relevante: Partidu tolu apoiu Lú Olo iha eleisaun segunda volta

“Pontu tolu importante ne’e mak hanesan defende populasaun saudável no moris naruk, segundu ami hakarak populasaun ne’ebé matenek domina siénsia, domina teknolojia no ikus liu hadi’a nia padraun moris di’ak liu ne’e hanesan meiu importante ba ami iha ami-nia batalla,” atuál Primeiru-Ministru ne’e afirma.

Ba kestaun ne’e, Prezidente PLP ne’ebé hanesan mós Primeiru-Ministru VIII iha tempu besik sei husu lisensa hosi nia kargu hodi la’o hamutuk ho Lú Olo halo kampaña ba eleisaun segunda volta.

“Ha’u sei hamrik iha palku leten hodi apoiu kandidatura Lú Olo, tempu badak tan ha’u sei hasai lisensa ba ha’u-nia Vise Primeira-Ministra mak sei asumi kargu Primeru-Ministru ein-ezersísiu to’o kampaña hotu mak ha’u filafali,” Taur dehan.

PLP halo konferénsia nasionál ho tema ‘hamutuk ita reflete pasadu, afirma ita-nia konsiladasaun no servisu maka’as ba povu nia moris di’ak’, iha salaun Canossa Has-laran Manleuana, domingu (27/03). Imajen TATOLI/Egas Cristóvão

Iha konférensia nasionál PLP, Taur hato’o nia diskursu hodi aprezenta mós ho video ne’ebé hanesan relatóriu servisu VIII Governu Konstitusionál.

“Iha vídeo ohin hatudu katak konsentra hotu edukasaun, saúde, abitasaun ho projetu sira seluk ne’ebé liga ba ema-nia moris no agrikultura atu motiva sidadaun sira halo produsaun maka’as iha tinan-tolu tutuir malu, ami tau osan millaun $160 ba Cesta Bázika, iha tinan 2020 tau millaun $71, tinan 2021 millaun $12 no tinan ne’e ita tau millaun $80. Ida-ne’e signifika fó rendimentu ba populasaun sira,” nia tenik.

Jornalista : Hortencio Sanchez

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here