Estudante Institute Of Busines (IOB) iha kampus Maliana-Bobonaro.Imagen Tatoli/Sergio da Cruz

BOBONARO,26 marsu 2022 (TATOLI)—  Reitór Institutu Of Busines (IOB), Pedro Ximenes, sábadu ne’e, hala’o lansamentu aula prezensiál foun tinan letivu 2022 ho objetivu habelar sistema apredizajen mistura ba estudante sira hotu iha munisípiu no kampus sentrál Dili hodi garante kualidade edukasaun.

Biban ne’e, Reitór IOB ne’e dehan atividade lansamentu aula apredizajen foun tinan letivu 2022 iha kampus Maliana-Bobonaro atu fó oportunidade hanesan ba estudante sira bele asesu edukasaun ho kualidade exelente.

Reitor Institute Of Busines (IOB), Pedro Ximenes. Imajen Tatoli/Sergio da Cruz

“Ita nia intensaun katak iha materia balun ne’ebé mak profesór sira hanorin ba estudante iha Dili nia konteúdu materia hanesan ho estudante sira Maliana Tanba bele halo interasaun ho profesór sira iha Dili liuhosi telekonferénsia” Reitór ne’e hateten liuhosi intervesaun iha kampus Maliana.

Atu hasae kualidade edukasaun, IOB mós implementa ona atividade extra kurikuler iha Dili liuhosi formasaun gratuita iha área kontablidade, área ICT nia mk open sorts no Web design, língua Inglés no Portugués.

Nune’e, iha tinan ne’e hakarak implementa mós iha munisípiu sira ho meiu semana ida estudante sira partisipa aula dala-tolu,hodi bele hariku estudante sira nia abilidade iha área oi-oin.

Daudaun IOB iha dosente na’in-185, hosi númeru ne’e maioria kompleta ona kursu mestradu no doutoramentu sira iha rai laran no nasaun estranjeiru sira, nune’e bele aplika siénsia ba estudante tuir kapasidade ne’ebé iha durante hetan iha estudu.

Ba oin, IOB sei investe makas liután iha kampus sira hanesan Maliana no Baucau, kona-ba ekipamentu prátika, laboratóriu no kondisaun infraestrutura atu asegura edukasaun ne’ebé di’ak ba timór-oan sira hotu.

“Ha’u husu ba estudante sira labele duvida ho kualidade IOB nia tanba edukasaun ne’ebé ita fó iha ne’e hanesan mós iha Dili, ita mós hakarak imveste barak iha Maliana, nune’e bele kria ambiente ne’ebé di’ak ba estudante sira atu bele aprende. Importante mak sira iha vontade hakarak aprende ita prontu atu prepara rekursu no fasilidade sira,” nia sujere.

Diretor Institute Of Busines (IOB) Maliana,Mateus da Silva. Imajen Tatoli/Sergio da Cruz

Iha fatin hanesan, Diretór IOB Maliana, Mateus da Silva, reforsa durante ezisténsia instituisaun ensinu superiór privada ne’e iha Maliana konsege loke de’it klase extensaun tanba estudante sira ne’ebé mai rejistu barak mak funsionáriu no ema ne’ebé servisu.

Maibé, iha tinan ne’e loke tan klase regulár hodi fó oportunidade ba estudante sira ne’ebé ramata estudu iha nivél Sekundária iha Bobonaro laran.

IOB iha Maliana mós iha fulan hirak liuba hetan ona akreditasaun hosi Agência Nasionál ba Avaliasaun Akreditasaun Akadémiku (ANAAA, sigla portugés) ho valór avaliasaun (B).

“Tinan ne’e, ami simu ona estudante foun tinan letivu 2022 na’in-133, maibé tanba ita haree númeru estudante komesa barak ona, agora ita loke tan klase regular ba estudante hamutuk na’in- 72. Ami fiar katak prosesu apredizajen bele la’o ho di’ak tanba ami iha ekipamentu no sala aula ne’ebé sufisiente atu akumula estudante hotu,” nia garante.

Kampus IOB Maliana iha fakuldade Ekonomia no Negósiu ho nia Departanmentu rua mak Jestaun Finanseira no Jestaun Ekonomia, Fakuldade imformatia nia mak jestaun informatika no tékniku informatika.

Totál Estatudante na’in-300-resin, kompostu hosi semester I na’in-133, semester III na’in-88, semester V na’in-44, semester VII na’in-20 no finalista hamutuk na’in-28. Enkuantu totál dosente permante no kontratadu ka part time nain-18.

Jornalista : Sérgio da Cruz

Editor       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here