Espoza Prezidente Repúblika, Cidália Lopes Nobre Mouzinho Guterres, simu prémiu nu’udar feto inspiradora hosi Amazon Watch Magazine’s Blue Ribbon Award iha Dubai-Uni Emirate Árabe (UEA). Imajen/Espesiál.

DILI,26 marsu 2022 (TATOLI)—Espoza Prezidente Repúblika, Cidália Lopes Nobre Mouzinho Guterres, sesta ne’e, simu prémiu nu’udar feto inspiradora hosi Amazon Watch Magazine’s Blue Ribbon Award no annual Global Women Leaders Hall of Fame (GWLHOF) iha selebrasaun tinan-sia South America-Africa-Middle-Asia Women Summit (SAMEAWS) ne’ebé hala’o iha Dubai-Uni Emirate Árabe (UEA).

Espoza Xefe Estadu, Francisco Guterres Lú-olo ne’e hetan konvite hosi Amazon Watch Magazine hodi aprezenta nia kandidatura iha novembru 2021 no tuir entrevista online hodi kompete ba prémiu ne’e. Hafoin liu prosesu entrevista, Cidália sai kandidatu selesionadu númeru da-sia hosi país 50 ne’ebé partisipa no sai aprezentadora iha eventu ida ne’e.

Espoza PR simu prémiu ho kategoria feto inspiradóra ne’ebé nomeia hosi Amazon Watch Magazine ba servisu no inspirasaun sira ne’ebé durante ne’e hala’o iha Timor-Leste.

Espoza Prezidente Repúblika, Cidália Lopes Nobre Mouzinho Guterres, simu prémiu nu’udar feto inspiradora hosi Amazon Watch Magazine’s Blue Ribbon Award iha Dubai-Uni Emirate Árabe (UEA). Imajen/Espesiál.

“Ha’u agradese ba ita boot sira-nia fiar hodi selesiona ha’u ba prémiu ida ne’e liuliu ba senhor Ken Giami ne’ebé organiza no mós kandidatu sira seluk ne’ebé ha’u iha oportunidade koñese liuhosi partisipasaun ida ne’e,” Espoza PR ne’e hateten liuhosi intervesaun iha eventu mundiál ne’ebé Agência TATOLI asesu, sábadu ne’e.

Espoza PR simu prémiu ne’e iha loron 25-marsu, hafoin partisipa konferénsia Internasionál ne’ebé realiza iha Burj CEO Award Summit iha Dubai ne’ebé partisipa mós  hosi nasaun oin-oin hodi ko’alia kona-ba feto sai inspiradora ba feto hotu iha mundu.

Prémiu ne’e nu’udar rekoñesementu ba feto Timór nia serbisu no mós responsabilidade boot atu aprezenta ba mundu kona-ba knaar feto Timor halo hodi kontribui ba dezenvolvementu Timor Leste ne’ebé hanesan no inklusivu.

Espoza Prezidente Repúblika, Cidália Lopes Nobre Mouzinho Guterres. Imajen/Espesial

“Ha’u mós haksolok tanba programa ne’ebé ha’u hala’o loron ruma bele inspira feto maluk seluk hanesan ha’u temi bebeik iha ha’u-nia rain.  Ha’u hakarak kontinua hatutan no haforsa feto, labarik no ema sira ne’ebé laiha kbiit atu hato’o sira nia lian.  Nune’e sira bele sente katak sira partense ou sai na’in ba prosesu dezenvolvementu nasaun foun ida  hanesan Timor-Leste,” Espoza PR ne’e sente haksolok.

Cidália hatutan: “Dame ne’e posivel, maske lori tempu naruk atu atinje. Atu hetan dame persiza ema hotu nia komitementu no responsabilidade, labele lakon esperansa, labele hakiduk tanba ha’u fiar “dame buat ida ne’ebé ami bele hetan” nune’e feto no ema iha fatin seluk bele hetan ida-idak nia fatin”.

Jornalista : Felicidade Ximenes

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here