Xefe Estadu Maiór Jenerál F-FDTL, Tenente Jenerál Falur Rate Laek, hasai foto hamutuk ho manán-na’in sira, iha Kurtél Jenerál F-FDTL, Fatuhada, sesta (25/03/2022). Imajen TATOLI/Antónia Gusmão

DILI, 25 marsu 2022 (TATOLI)–Membru FALINTIL-Forsa Defeza Timor-Leste (F-FDTL), Tenente Leandra Ferinda Gonzaga, sai vensedora ba konkursu diskursu públiku femenina militár iha kategoria ofisiál, vensedora daruak mak Alferis Maria Xavier no datoluk mak Tenente Julia da Costa.

“Eventu ne’e importante iha vida instituisaun, familiár, no sosiedade. Ha’u fó parabéns ba hirak ne’ebé konkorre no parabéns mós ba manán na’in-sira. Ha’u sente imi konkista pasu ida maibé pasu barak sei halo, ha’u apresia ho susesu ne’ebé alkansa iha tempu badak ida-ne’e,” Tenente Jenerál Falur Rate Laek, hateten iha ámbitu enserramentu konkursu diskursu públiku militár femenina, iha salaun reuniaun Kurtél Jenerál F-FDTL, Fatuhada, sesta ne’e.

Notísia relevante: Tenente Jenerál Falur husu membru F-FDTL hatudu profisionalizmu

Enkuantu, kategoria sarjentu nian, vensedora dahuluk mak segundu sarjentu Antonieta da Silva, vensedora daruak sarjentu Armanda Freitas, vensedora datoluk segundu sarjentu Silvina Ximenes, no vensedora dahaat segundu sarjentu Amena de Jesus.

Kategoria prasa (soldadu) vensedora dahuluk soldadu Isaura Freitas, daruak Kabu Angelina dos Reis, datoluk grumete Virgina da Costa no ikus liu soldadu Natalia Soares dos Santos.

Vensedora sira hotu simu prémiu no sertifikadu, vensedora dahuluk simu prémiu osan $200, daruak $150, no datoluk $100.

Maski nune’e, hirak ne’ebé antes kompete maibé la liu, komisaun organizadora atribui mós sertifikadu apresiasaun.

Ba kestaun ne’e, Xefe Estadu Maiór Jenerál F-FDTL, Tenente Jenerál Falur Rate Laek, apresia eventu ne’e tanba militár feto sira bele explora kapasidade ne’ebé sira hetan, liuhosi maneira saida de’it.

Vensedora Tenente Leandra Ferinda Gonzada, sente orgullu tanba eventu ne’e nu’udar oportunidade dahuluk ne’ebé F-FDTL realiza.

“Antes ne’e realiza uluk ona semináriu ne’ebé konvida parseiru sira fahe esperiénsia ligadu ho papél feto nian. Durante kompete difikuldade sempre iha tanba nu’udar ofisiál responsável ba asuntu serbisu, nu’udar inan no feto ne’ebé asume mós funsaun iha karrreira profisionál, sempre hasoru difikuldade sira, liliu fahe tempu ba família no mós karreira profisionál, entaun tempu ne’ebé ami atu prepara diskursu públiku ne’e limitadu tebes,” nia tenik.

Biban ne’e, Tenente Leandra apela ba militár femenina sira tenki kontinua apreende atubele aumenta koñesimentu, liliu iha dezenvolvimentu instituisaun família no nasaun.

Atividade ne’e foin realiza internál instituisaun nian iha kategoria ofisiál, sarjentu no prasa, ne’ebé responsabiliza hosi Gabinete Estadu-Maiór Jenerál, seksaun igualdade jeneru.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here