Prezidente Repúblika, Francisco Guterres Lú Olo, simu karta kredensiál hosi embaixadora Portugal Manuela Freitas Bairos. Imajen/Mídia PR.

DILI, 25 marsu 2022 (TATOLI)–Prezidente Repúblika, Francisco Guterres Lú Olo, sesta ne’e simu karta kredensiál hosi embaixadora Portugal foun ba Timor-Leste (TL), Manuela Freitas Bairos.

Notísia Relevante: Embaixador Portugal despede PR Lú Olo

“Ohin Prezidente Repúblika simu karta kredensiál ofisiál hosi embaixadora Portugal foun,” Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hateten ba jornalista sira hafoin akompaña embaixadora Portugal hodi aprezenta karta kredensiál ba Xefe Estadu iha edifísu Palásiu Prezidensiál Nicolau Lobato, Bairru Pite, Dili.

Ho aprezentasaun karta diplomata ne’e bele hala’o misaun iha Timor-Leste hodi troka embaixadór sesante ne’ebé misaun ramata ona no normalmente ba embaixadóra foun ho mandatu tinan tolu ba leten.

Embaixadora portugesa ne’e iha karreira diplomata tinan barak ona, antes sai embaixadora mai Timor-Leste uluk iha Jakarta-Indonézia no fó formasaun dahuluk ba diplomata timor-oan 50 iha tinan 2000 ho 2001 antes restaurasaun indepedénsia, nune’e mós servisu iha prezidénsia rotativu CPLP nian.

“Embaixadora ne’e, nia iha ligasaun forte ho Timor-Leste ne’ebé Prezidente Repúblika sente kontente tebes,” nia dehan.

Ministra ne’e hateten, hanesan komunidade lusofonu Portugal importante tebes ba Timor-Leste ho relasaun istóriku, língua ho mós relasaun bilaterál forte tebes durante ne’e iha setór edukasaun, defeza no seguransa ho sira seluk.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here