Hospitál Nasionál Guido Valadares (HNGV). Imajen Tatoli/Francisco Sony

DILI, 25 marsu 2022 (TATOLI)— Komisaun F ne’ebé trata asuntu Saúde, Seguransa Sosiál no Igualidade Jéneru iha Parlamentu Nasionál, husu ba Hospitál Nasionál Guido Valadares (HNGV) atu kontrola rigór ba profisionál saúde sira hodi fó etendimentu médiku ba pasiente sira ho di’ak.

Deputadu sira iha Komisaun F hato’o asuntu ne’e bainhira hala’o enkontru ho Konsellu Diretivu HNGV, relasiona ho família pasiente balun lamenta atendimentu saúde hosi pesoál saúde sira no públiku iha rede sosiál.

“Ami husu ba profisionál saúde iha HNGV atu hadi’a jestaun asisténsia médiku ba pasiente sira tenke ho di’ak. Komunidade sé de’it mak hetan atendimentu la di’ak hosi profisionál saúde ami iha direitu atu fó atensaun atu bele mellora atendimentu saúde ba populasaun enjerál ho di’ak,” Reprezentante Prezidente Komisaun F, Deputada Helena Martins Belo, hateten ba jornalista sira iha HNGV-Bidaun, sesta ne’e.

Família pasiente, Isolina Lobo Pinto, Imaje/Felicidade Ximenes

Iha biban hanesan, Família pasiente, Isolina Lobo Pinto, husu ba pesoál saúde sira iha HNGV atu ba oin hadi’ak jestaun ho di’ak hodi pasiente sira labele vítima.

“Ha’u klarifika direta ba Konsellu Diretivu sira, nune’e ba oin sira hadia  jestaun atendimentu ho di’ak tanba buat ne’ebé  mak akontese  mai ha’u labele repete tan ba ema seluk ne’ebé mai halo tratamentu iha ospitál ida ne’e,” nia sujere.

Entretantu, Diretór Ezekutivu HNGV, Alito Soares, dehan hafoin kazu ne’e mosu no família pasiente sira públika iha rede sosiál, Konsellu Diretiva HNGV bolu kedas kedas Xefe Departamentu Emerjénsia hodi rekolla kedas informasaun sira ne’ebé mak akontese iha momentu  ne’ebá.

“Ha’u bolu kedas sira ho ekipa pesoál saúde ne’ebé pikete no ha’u mós rekolla kedas informasaun sira ne’ebé mak família pasiente sira tau iha rede sosiál kona-bá atendimentu iha HNGV. Nune’e ami fó instrusaun ona atu pesoál saúde sira tenke melora servisu atendimentu ba pasiente iha Departmantu hotu ho di’ak,” Diretór Ezekutivu ne’e orienta.

Konsellu Diretivu mós fó ona xamada ba profisionál saúde ka Doutór ne’ebé  momentu ne’e pikete atu loron seluk tenke fó atendimentu saúde ba pasiente ho di’ak.

Notísia relevante: MS sei kontinua fó apoiu ba dezenvolvimentu HNGV

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here