Xefe Departamentu Reprezentasaun Territoriál Floresta Planta no Indústria Covalima, Francisco Sarmento. Imajen Tatoli/Celestina Teles.

COVALIMA, 25 marsu 2022 (TATOLI)—Xefe Departamentu Reprezentasaun Territoriál Floresta Planta Indústria Covalima, Francisco Sarmento informa, Servisu Floresta Munisípiu  Covalima liuhosi programa viveiru komunitária  kuda ona ai-kameli hun 556 iha rai ektare ida-resin iha postu sdministrativu Tilomar.

“Foin lalais ita kuda ona aikamela iha rai ektare ida ho balun iha postu administrativu Tilomar no ai-kameli sira-ne’e moris ho di’ak, tanba ita envolve tékniku dirasaun servisu floresta munisipál hodi halo tratamentu. Maibé iha postu administrativu Fatululik ho Zumalai ai-kameli ne’ebé ita kuda ne’e balun mate, tanba impaktu hosi udan monu rai ba beibeik,” Xefe Departamentu Francisco Sarmento, informa ba Agência Tatoli, iha suku Suai Loro, sesta ne’e.

Objetivu implementa viveiru kominitária ne’e atu ajuda komunidade, nune’e sira ida-idak iha sira-nia plantasaun rasik. 

Iha postu adminsitrativu Tilomar kuda ai-kameli hamutuk hun 556, iha postu administrativu Fatululik kuda ai-kameli 500, Zumalai hamutuk 500 maibé balun mate tanba sensitive entaun ai-kameli nia kuantidade menus.

Aleinde ne’e, liuhosi programa viveiru kominitária kuda Ai-kameli, Floresta Covalima mós kuda prepara tipu ai-oan sira seluk hanesan ai-saria, mahoni, ai-kakeu no ai-teka, nune’e iha époka udan ne’e hodi distribui ba agrikultór sira.

Floresta Covalima prodús ai-oan iha postu administrativu Fohorem hamutuk 20.000, Fatumea hamutuk 10.000, Maucatar hamutuk 10.000, Fatululik hamutuk 10.000 no postu administrativu  Zumalai hamutuk 20.000.

“Agora, tempu udan ne’e ita aproveita oportunidade fahe ai-oan ba ita-nia toos-na’in sira, bele kuda iha sir- nia toos rasik. Durtante ne’e, ita distribui ona ai-oan 800-resin no iha postu administrativu balun udan beibeik halo ai-oan balun mate,” nia relata.

Maibé, nia dehan, Floresta implementa programa viveiru komunitária ne’e hatudu rezultadu di’ak, tanba tekniku Floresta Covalima halo koordenasaun di’ak ho administradór postu administrativu sira no xefe suku ka xefe aldeia sira no kontinua distribui ai-oan ba agrikultór sira.

Durante ne’e, Floresta Covalima distribui ai-oan sira-ne’e, nia rezultadu seidauk hatene tanba foin mak halo distribuisaun ai-oan ba toos-na’in sira hodi kuda no Floresta Covalima seidauk halo levantamentu.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here