Arsebispu Arkidioseze Metropolitana Dili, Mgr. Virgílio do Carmo da Silva, SDB, tula liman ba diákonu na’in-rua no frater ida simu ordenasaun saserdotál no diakonál iha Igreja Katedrál Dili, sesta (25/03). Imajen Tatoli/Egas Cristovão.

DILI, 25 marsu 2022 (TATOLI)—Arsebispu Arkidioseze Metropolitana Dili, Mgr. Virgílio do Carmo da Silva, SDB, sesta ne’e ordena diákonu na’in-rua sai Nai-lulik no ordena frater ida sai diákonu iha iha Igreja Katedrál Dili.

Iha ordenasaun saserdotál ne’e, diákonu Abríl dos Santos no Helio Castro Alves sai padre no iha ordenasaun diakonál ne’e lori frater Victór de Jesus ordena sai diákonu.

Arsebispu Arkidioseze Metropolitana Dili, Don Virgílio do Carmo da Silva, SDB, konvida sarani sira sai sasin ba mistériu boot enkarnasaun nian tanba Nai Feto nia laran luak no disponibilidade hili ema na’in-tolu ne’e sai padre diákonu.

“Ohin, konvida ita dadaer ida ne’e atu sai sasin dala ida tan kona-bá mistériu boot ba enkarnasaun ni’an, tanba na’in feto nia laran luak, tanba na’in feto nia sim, tanba na’in feto nia disponibilidade mak ohin Hélio Castro Alves, Abril dos Santos noVitór de Jesus, sira-na’in tolu iha ita-nia leet hanesan na’in feto manifesta nia “sim” ida ba diákonu rua ba Amu lulik,” Arsebispu Arkidioseze Metropolitana Dili, Don Virgílio do Carmo da Silva, SDB, hateten liuhosi nia omilia, iha ordenasaun saserdotál ba diákonu na’in-rua no ordenasaun diakonál ba frater na’in-ida, iha Igreja Katedrál, Dili.

Ohin sira na’in-tolu mós hakarak atu hola parte iha Kristu nia saserdota atu hala’o knar amu lulik no diákonu ni’an, hodi hatudu sira-nia domin boot ba Maromak no hakonu an hodi haklaken  Maromak nia liafuan ba sarani sira.

“Ne’eduni, ha’u iha pontu tolu atu fó ba imi na’in-tolu nu’udar bukae. Dahuluk, atu bainhira ko’alia kona-bá diákonu ida ka amu lulik ida, hanesan ema ida-ne’ebé iha domin boot ba Maromak ninia liafuan. Hakonu nia an riku soin, liafuan Maromak ni’an no haklaken liafuan hanesan evanjellu haklaken atu nia moris la’ós de’it haklaken ba ema seluk, maibé uluk nanain imi na’in-tolu mak tenke hakaas an atu moris uluk buat ne’ebé imi haklaken. Tanba ne’e, orsida sei fó hanoin fila-fali ba ita iha liafuan ne’ebé diákonu ni’an dehan, hanorin buat ne’ebé ó fiar, moris tuir buat ne’ebé ó hanorin,” nia dehan.

Ne’eduni molok hanorin, nia dehan, imi na’in tolu rasiik fiar no moris tuir buat ne’ebé Nai hanorin, ida-ne’e mak durante ne’e imi na’in-tolu prepara iha imi-nia an ba iha servisu Maromak ni’an, ne’ebé mak ohin fó hanoin tan dala ida ba imi na’in-tolu knaar hanorin no knaar haklaken.

Entaun, diákonu no Amo lulik nia knar atu halo Maromak Nia projetu mak hatene didi’ak Maromak nia liafuan, moris tuir didi’ak Maromak nia liafuan mak ida be haklaken Maromak nia liafuan ba sarani sira, la’ós projetu harii uma ni’an maibé prioridade ba Amo Lulik ida mak hadomi no haklaken Maromak nia liafuan.

Daruak, Diákou no Amo lulik ida-nia knar sai nu’udar bibi atan, tanba sira simu Maromak nia liafuan fó kbiit hodi sai Maromak nia oan hodi fiar iha nia naran, tanba ne’e Amo lulik ka Diákonu atu lori moris ida-ne’e.

“Bibi atan ida atu mai, bibi atan ida atu harii komunidade, ne’eduni ko’alia kona-bá komunidade atu dehan katak ita moris hamutuk nu’udar maun alin no nu’udar Amo lulik. Tanba, Amo lulik nia knar, nia tenke sai fatór prinsipál atu hakuak maibé uluk nanain sai ponte ba Amo lulik sira hotu, mak ita bele sai ponte mós ho sarani sira,” nia hateten.

Datoluk, Diákonu no Amo lulik ida ema sakramentu ninian, sakramentu Eukaristia nian mai iha mundu atu la abandona ema iha dalan mundu ni’an.

“Tanba ne’e, nia husik hela eukaristia, husik hela paun. Entaun, iha ne’e ita fahe ita paun iha ami leet no ema hotu ne’ebé han sei la hamlaha tan. Tanba, Maromak nia liafuan sai ai-han ba ema no ba mundu, tanba ne’e, amo lulik ida tenke iha fuan no eukaristia,” nia afirma.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here