Administradór munisípiu Viqueque, Januário Soares ‘Bolly’. Imajen TATOLI/ Vitorino Lopes da Costa

VIQUEQUE, 25 marsu 2022 (TATOLI)—Autoridade munisipál fó alternativa fatin bainhira atu realiza kampaña iha munisípiu Viqueque ba Eleisaun Prezidensiál 2022 segunda volta, ne’ebé labele besik no perturba atividade iha eskola no igreja.

Kampaña ba eleisaun primeira volta ne’ebé realiza durante semana rua iha Viqueque iha Kampu futeból Beloi ne’ebé besik Eskola Ensinu Báziku Filiál (EBF) 01 no kampu futeból Viqueque villa besik Eskola Sekundáriu Santo Estevão no Igreja Imaculada.

“Ita sei presiza fatin própriu ruma hodi prepara kampaña polítika sira, atu labele pertuba eskola sira. Alternativa seluk maka ba kampu aviasaun Naheboruk ne’ebé dook hosi eskola, ita buka fatin seluk mós labele tanba agora daudaun besik tempu halo kampaña,” Administradór munisípiu Viqueque, Januário Soares ‘Bolly’, hateten ba Agência TATOLI, iha ninia knaar fatin, sesta ne’e.

Notísia relevante: CNE rekoñese Viqueque seidauk iha fatin própriu ba kampaña

Tuir Autoridade munisipál ne’e, Kandidatu Prezidente Repúblika (PR) sira bele uza kampu aviasaun hodi hala’o kampaña tanba fatin ne’e livre hosi eskola sira iha munisípiu Viqueque.

Tuir Januário Soares, kampu futeból rua ne’ebé uza sai fatin kampaña ba kandidatura 16 antes ne’e difikulta prosesu aula prezensiál eskola.

“Ha’u rekoñese durante kampaña prezidensiál iha munisípiu ne’e iha kampu rua hodi hala’o  kampaña eletorál, difikulta duni prosesu prezensiál tanba kampu rua ne’e besik liu áreadór eskola. Maibé, ita haree rezultadu apuramentu, bainhira iha eleisaun segunda volta, kandidatu mais votadu na’in-rua mak atu avansa.  Ha’u sente ladún perturba fali eskola sira tanba hela kandidatura rua maka halo kampaña eletorál,” nia akresenta.

Bazeia ba atualizasaun dadus ikus hosi Sekretariadu Tékniku Administrasaun Eleitorál (STAE) ba rezultadu Eleisaun Prezidensiál 2022 primeira ronda iha 19 marsu, kandidatura rua mais votadu mak hanesan José Ramos Horta ho votu 301.481 (46,58%) no Francisco Guterres ‘Lú Olo’ ho votu 143.408 (22,16%), hosi totál votu válidu hamutuk 647.172 iha territóriu nasionál.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here