Ámbitu abertura atividade akadémika pre-universitáriu dahuluk UCT, iha salaun UCT, Balide, kinta (24/03). Imajen TATOLI/Tomé Amado

DILI, 24 marsu 2022 (TATOLI)–Universidade Katólika Timorense (UCT, sigla portugés), kinta ne’e, hahú atividade akadémika tinan 2022 liuhosi prosesu aprendizajen pre-universitáriu dahuluk, ho durasaun semana 15 hodi prepara ba semestre tuir mai.

Reitór UCT, Padre Joel Casimiro Pinto, informa, durante loke inskrisaun hahú iha loron 10 janeiru to’o 11 fevereiru 2022, iha aplikante hamutuk 2.000 resin maibé hafoin tuir prosesu selesaun bazeia ba rekezitu sira, iha ema na’in-491 mak admitidu, ne’ebé distribui ba fakuldade Edukasaun, Lian no Arte, Siénsia Umana, Siénsia Médika no Enjeñaria Agríkola.

“Universidade ne’e iha nia objetivu prinsipál atu sai hanesan universidade ensinu investigasaun sientífika Timor-Leste, ho proporsionadu iha edukasaun umana, morál, espirituál, no intelektuál ba universitáriu sira,” Reitór universidade hateten iha edifísiu UCT, Balide.

Notísia relevante: Arsebispu Dom Virgílio husu Dirijente Universidade Katólika serbisu ekipa

Iha biban hanesan, Arsebispu Arkidioseze Dili, Dom Virgílio do Carmo da Silva, enkoraja estudante sira prepara-an hodi domina lian portugés no inglés no husu mós ba dosente sira atu servisu maka’as hodi atinje objetivu sira.

“Ema barak halo inskrisaun, maibé admitidu oituan de’it tanba ita fó liu prioridade ba kualidade do que kuantidade,” Dom Virgílio dehan.

Nune’e mós, Reprezentante Ministériu Ensinu Superiór Siénsia no Kultura, Siénsia no Kultura no atuál Prezidente Konsellu Ezekutivu Institutu Nasionál Siénsia no Teknolojia, José Cornelio Guterres, enkoraja korpu dosente sira hotu hodi konkista kualidade ensinu, liuhosi kurríkulu exelente hodi hanorin no prodús estudante sira ho kualidade.

“Ha’u husu ba dosente sira hotu katak la’ós ona tempu atu hanorin de’it matéria iha aula, maibé presiza halo peskiza hodi hamosu siénsia no teknolojia foun,” akadémiku ne’e hameno.

Antes ne’e, UCT lansa iha loron 08 dezembru 2021 no iha tempu hanesan halo mós nomeasaun ba estrutura ezekutiva sira.

Igreja prepara ona ema 50 ho nível akadémiku doutoramentu no mestradu atu hanorin iha universidade ne’e, ne’ebé rekursu umanu sira maioria timor-oan inklui envolve mós ema estranjeiru balun.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here