Komandante PNTL RAEOA Superintendente Xefe Mateus Mendes. Imajen Tatoli/Abilio Elo Nini.

OÉ-CUSSE, 24 marsu 2022 (TATOLI) – Durante Eleisaun Prezidensiál 19 marsu tinan ne’e, Polísia Nasionál Timor-Leste (PNTL), Rejiaun Administrativa Espesiál Oé-Cusse Ambeno (RAEOA) rejista kazu asalta malu entre militante kandidatura iha suku Cunha, aldeia Noafafu, sub-rejiaun Pante Makasar.

“Durante kampaña loron 15 to’o distribuisuan materiál sensitivu situasaun la’o di’ak, maibé to’o loron eleisaun ita rejista kazu ida iha sentru votasaun Noapai, joven sira hosi partidu FRETILIN asalta família ida hosi partidu CNRT, ne’ebé keixa hatama ona iha polisia unidade investigasaun atu halo prosesu” Komandante PNTL RAEOA, Superintdendete Xefe, Mateus Assunção Mendes, informa ba Agência Tatoli iha Oé-Cusse, kinta ne’e.

Maske komandante PNTL O’e-Cusse ne’e la sita ho dettala kona-ba kronolojia hosi kazu ne’e, maibé kazu iha prosesu investigasaun hafoin remata sei enkamiña ba Tribunál Distritál Oé-Cusse (TDO).

“Nia kronolojia ha’u labele fó detalladu, tanba kazu ne’e envolve grupu joven asalta membru família ida, no kazu ne’e sei iha prosesu seidauk remata, ida-ne’e mak realidade ne’ebé PNTL rejista iha loron eleisaun,” nia katak.

Komandante PNTL Oé-Cusse ne’e nafatin apela ba komunidade iha terotóriu Oé-Cusse, atu mantein disiplina hodi kontribui pás no estabilidade, karik akontese eleisaun segunda volta.

Xefe suku Costa Aleixo Abi, hatete, maske iha duni kazu maibé laiha impaktu ba eleisaun iha Oé-Cusse.

“Ha’u-nia suku iha kedas vila situasaun la’o hakmatek, tanba esforsu hosi parte seguransa kontinua asegura fatin hotU-hotu, kazu ne’ebé akontese iha Cunha, ida-ne’e falta disiplina hosi militante, tán ne’e ira agradese ba PNTL konsege normaliza hodi garante eleisaun ne’e la’o di’ak iha teritóriu Oé-Cusse,” autoridade komunitáriu ne’e orgullu.

Jornalista       : Abílio Elo Nini
Editór             : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here