Primeiru-Ministru, Taur Matan Ruak. Imajen TATOLI/Francisco Sony.

DILI, 24 marsu 2022 (TATOLI)–Primeiru-Ministru (PM), Taur Matan Ruak, relata preparativu Governu nian bainhira akontese eleisaun prezidensiál segunda volta ba Prezidente Repúblika, Francisco Guterres Lú Olo.

“Enkontru ohin ko’alia asuntu rua de’it mak ida preparativu ita halo tanba eleisaun prezidensiál segunda volta nian no ida seluk mak ko’alia COVID-19 nian mak ita-nia esforsu halo oinsá mak kontinua halo kampaña vasinasaun,” Primeiru-Ministru Taur Matan Ruak hateten ba jornalista sira hafoin ramata enkontru semanál ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.

Preparativu sira hosi STAE-CNE mak hala’o no Governu nia apoiu sira-nia atividade sira bele la’o di’ak no reforsa seguransa atividade sira hodi asegura ho di’ak.

“Hanesan ita-boot sira hatene, eleisaun foin daudaun iha difikuldade balun liu-liu iha sentru votasaun paralelu oinsá ajuda sira fila-fali ba iha sira-nia fatin, bele partisipa iha festa demokrásia ne’e,” nia hateten.

Hatán difikuldade kondisaun estrada balun liga sentru votasaun iha área rurál, PM Taur hatán, haree hela esforsu saida mak bele halo ajuda liu-liu fatin sira-ne’ebé dezastre naturál estraga estrada sira bele fasilita transporta materiál eleisaun no movimentu sidadaun.

Governu garante kona-ba orsamentu laiha problema hodi bele utiliza ba eleisaun primeira no segunda volta.

Antes ne’e, Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten taxa partisipasaun eleisaun prezidensiál 2022 ne’e sae ka aas liu to’o atinje 77,26% kompara ho eleisaun 2017 ne’ebé taxa partisipasaun atinje 71,18%.

“Taxa partisipasaun iha eleisaun 2022 kompara ho eleisaun 2017 ne’e, eleisaun 2022 ne’e aas liu tanba eleisaun 2017 taxa partisipasaun eleitór 71,16% ho eleitór hamutuk 743.150 maibé eleisaun 2022 ne’e taxa partisipasaun eleitór 77,26% ho eleitór hamutuk 647.172. Signifika eleisaun 2022 ne’e sa’e no ass liu,” Acilino Manuel Branco hateten ba jornalista sira, bainhira partisipa plenária iha CNE ba abertura apuramentu, segunda ne’e.

Diretór Jerál ne’e hatutan, ko’alia kona-ba rezultadu STAE lakohi adianta prosesu ruma ne’ebé seidauk tau rohan loloos no hosi parte STAE nian konklui ona maibé iha CNE sei iha tan loron tolu ba apuramentu nasionál ba buletin votu.

Tuir rezultadu apuramentu finál provizóriu hosi STAE haruka kandidatu Prezidente Repúblika, José Ramos Horta ho votu 301481 (46,58%), Francisco Guterres Lú Olo hod votu 143408 (22,16%), Armanda Berta dos Santos ho votu 56289 (8,70%), Lere Anan Timur ho votu 48959 (7,57%), Mariano Assanami Sabino Lopes ho votu 47008 (7,26%).

Kandidatu PR Anacleto Ferreira ho votu 13059 (2,02%), Martinho da Silva Gusmão ho votu  8485 (1,31%), Hermes da Rosa Correia Barros ho votu 7958 (1,23%), Maria Helena Lopes de Jesus ‘Milena’ Pires ho votu 5335 (0,82%), Isabel da Costa Ferreira ho votu 4165 (0,64%).

Kandidatu indepednente Felisberto Araújo Duarte ho votu 2615 (0,40%), Constâncio Pinto ho votu 2474 (0,38%), Rogéiro Tiago Lobato ho votu 2028 (0,31%), Virgílio da Silva Guterres ho votu 1685 (0,26%), Antero Benedito da Silva ho votu 1531 (0,24%) no Maria Ângela Freitas da Silva ho votu 692 (0,11%).

Enkuantu, daudaun CNE sei hala’o hela apuramentu Nasionál no totál eleitór ne’ebé rejistadu iha STAE hamutuk 859,631.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here