Edifísiu Eskola Ensinu Báziku Sentrál (EBC) 02 Cabira-oan, munisípiu Viqueque. Imajen TATOLI/Vitorino Lopes da Costa

VIQUEQUE, 24 marsu 2022 (TATOLI)–Diretór Servisu Edukasaun munisípiu Viqueque, Emídio Amaral, informa, Provedoria Direitu Umanu no Justisa (PDHJ, sigla portugés) identifika ona profesór na’in-tolu partisipa kampaña Kandidatu Prezidente Repúblika ba períodu 2022-2027 iha oras serbisu.

“Antes ne’e ami halo ona karta sirkulár iha loron 28 janeiru 2022 hodi fó ba eskola sira hotu  iha munisípiu Viqueque, katak bandu diretór eskola, funsionáriu no profesór sira labele tuir kampaña iha oras serbisu, bainhira hakarak tuir kampaña iha loron domingu.   Maibé realidade iha munisípiu Viqeuque PDHJ  hatama ona lista profesór na’in-tolu maka partisipa kampaña,” Diretór Servisu Edukasaun hateten ba Agência TATOLI, iha administrasaun munisípiu Viqueque, kinta ne’e.

Notísia relevante: PDHJ deteta kandidatu PR balun komete irregularidade iha kampaña eleitorál

Nune’e, iha semana ne’e PDHJ kontinua lori lista profesór na’in-tolu ne’e aprezenta iha Komisaun Funsaun Públika hodi bolu atensaun ba kestaun ne’e.

“Iha eleisaun tinan 2017 liubá,  ita-nia profesór hosi munisípiu Viqueque hamutuk na’in-30 maka partisipa  iha kampaña, ne’ebé ikus mai ba hatan iha Komisaun Funsaun Públika,” nia akresenta.

Profesor sira ne’ebé naran tama iha lista PDHJ hosi Eskola Ensinu Sekundáriu Jerál 04 Setembru no Eskola Ensinu Báziku Sentrál (EBC, sigla portugés) 02 Cabira-Oan.

Ba kestaun ne’e, Agência TATOLI seidauk hetan konfirmasaun hosi parte eskola inklui profesór sira ne’ebé partisipa kampaña iha oras serbisu.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here