Kandidatu Prezidente Repúblika períodu 2022-2027, Martinho Germano da Silva Gusmão. Imajen TATOLI/Jogerjo Guterres

DILI, 24 marsu 2022 (TATOLI)–Kandidatu Prezidente Repúblika (PR) independente ba períodu 2022-2027 ho númeru sorteiu 13, Martinho Germano da Silva Gusmão, simu ona vizita hosi reprezentante kandidatura, Francisco Guterres ‘Lú Olo’ no José Ramos Horta, ligadu ho apoiu polítiku bainhira hakat ba eleisaun segunda ronda.

“Reprezentante hosi kandidatu Lú Olo no Ramos Horta mai ona ko’alia ho ha’u, agora ha’u tama iha lista dahituk no haree ba ha’u-nia forsa polítika ka influénsia, sira mai ona atu ko’alia maibé sira husu ajuda ha’u, enkuantu ha’u ba mesak ne’e votu ida de’it maibé ba atu ajuda serbisu depende ba sira fó espasu atu aprezenta ha’u-nia programa, maibé tempu sei iha tanba apuramentu seidauk hotu no desizaun finál hosi Tribunál Rekursu mós seidauk,” Martinho Gusmão, informa ba Agência TATOLI, iha nia rezidénsia Metiaut, kinta ne’e.

Bazeia ba atualizasaun dadus ikus hosi Sekretariadu Tékniku Administrasaun Eleitorál (STAE) ba rezultadu Eleisaun Prezidensiál 2022 primeira ronda iha 19 marsu, Martinho Gusmão hetan votu 8.485 (1,31%) hosi totál votu válidu hamutuk 647.172 iha territóriu nasionál.

Enkuantu, Kandidatu PR, José Ramos Horta ho votu 301.481 (46,58%) no Kandidatu PR, Francisco Guterres ‘Lú Olo’ ho votu 143.408 (22,16%), ne’ebé posibilidade kandidatura rua kompete iha eleisaun segunda volta.

Notísia relevante: Martinho Gusmão introdús prioridade tolu durante kampaña iha Baucau

Bainhira rejista kandidatura iha Tribunál Rekursu, Martinho Gusmão mai ho proponente hamutuk 10.000.

Nia dehan, antes ne’e, estrutura Partidu Unidade Dezenvolvimentu Demokrátiku (PUDD), ne’ebé antes ne’e fó apoiu ona ba nia, ba hasoru ona Ramos Horta.

“Maibé ami la tuur hamutuk atu diskute, tanba antes sira deklara apoiu ha’u, maibé iha kampaña sira fahe ba rua, balun apoiu FRETILIN no balun apoiu ha’u, ne’ebé ha’u-nia pozisaun la’ós deside PUDD atu apoia Lú Olo ka Ramos Horta, ne’e husu ba PUDD. Horiseik Prezidente PUDD telefone ona ha’u, maibé ha’u atu hakat hosi fatin (Metiaut) bá to’o iha Farol ne’e parese sira enkontru hotu ona maibé ha’u seidauk to’o, sira kontaktu ha’u iha minutu ikus ne’ebé ha’u la konsege bá,” nia haktuir.

Kandidatu independente ne’e prefere Prezidente Repúblika tuir mai bele iha korajen atubele halo transformazaun la’ós de’it tranzisaun.

“Tranzisaun ne’e katak hosi ida fó tutan ba ida, maibé transformasaun ne’e signifika loke espasu no fatin ba ema hirak ne’ebé iha kualidade no vizaun bele hatudu nia lidernasa. Prezidente Repúblika asume responsabilidade boot tebes atu lori transformasaun no iha tempu hanesan mós hametin justisa ho pás,” nia tenik.

Rekomenda hadi’a sistema eleitorál hodi garante kualidade eleisaun

Iha sorin seluk, Martinho Gusmão husu ba órgaun eleitorál hanesan Komisaun Nasionál Eleisaun (CNE, sigla portugés) no STAE atu hadi’a sistema nune’e garante kualidade eleisaun no hetan rezultadu di’ak.

“Ha’u prefere apela ba órgaun eleitorál atu iha tempu badak kria kondisaun, se lae votante oituan liu ne’e ninia legalidade no lejitimidade ein kestaun, ho ida-ne’e kualidade eleisaun iha problema nia-laran,” nia fó hanoin.

Alende ne’e, Martinho Gusmão apela ba Governu atu kria kondisaun atu ema bele vota ho vontade.

Notísia relevante: Debate para dalan klaran, Prezidente CNE dehan normál

Nia mós nota katak servisu órgaun eleitorál balun presiza hadi’a, hanesan prosesu debate kandidatura no votu paralelu ne’ebé halo ema barak la konsege vota.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here