Kandidatu Prezidente Repúblika, Francisco Guteres 'Lu Olo', akompaña hosi nia espoza Cidália Nobre Lopes Mouzinho Guterres báinhira halo kampaña iha Liquica, sesta (04 marsu 2022). Imajen Tatoli/ Antonio Dasiparu.

DILI, 24 marsu 2022 (TATOLI)—Kandidatu Prezidente Repúblika períodu 2022-2027 ho númeru sorteiu neen (6), Francisco Guterres Lú Olo, agradese ba apoiante ka eleitór 1.125 ne’ebé fó fiar ba nia re-kandidata an ba Prezidente Repúblika.

“Ha’u sente onradu tebes no agradese ba apoiante ka eleitór ida-idak ne’ebé fó fiar nafatin ba ha’u atu re-kandidata an ba Prezidente Repúblika. Konfiansa ne’e ha’u simu uluk liuhosi maluk 1,125 ne’ebé asina petisaun no husu ba ha’u atu re-kandidata an dala ida tan ba Prezidente Repúblika. Konfiansa ne’e mai hosi veteranu, jerasaun patriota, hosi katuas-ferik to’o juventude lóriku asswa’in tomak, natar-nain no to’os nain sira, produtór kafé, traballador iha sektor públiku no privadu, estudante sira, intelektuál no akadémiku sira, hosi munisípiu hotu no RAEOA,” refere komunikadu imprensa ne’ebé Agêbcia Tatoli asesu, kinta ne’e.

Lú Olo agadese apoiu tomak hosi partidu FRETILIN ne’ebé mobiliza ninia rekursu umanu no lojístiku hodi apoiu iha kampaña tomak, no apoiu hosi kandidatu partidu Os Verdes, kuadru partidu PLP no PUDD, organizasaun Kolimau 2000 ho sira seluk no no sidadaun ida-idak ba kandidatura daruak.

“Konfiansa no apoiu sira-ne’e hotu mak habrani kandidatu iha kampaña eleitorál hodi husu ba povu vota ba nia kandidatura sai Prezidente Repúblika ba Timor-Leste no ba povu tomak,” nota ne’e hateten.

Votasaun eleisaun prezidensiál ne’ebé realiza iha iha 19 marsu liubá ne’e la’o ho hakmatek, livre, demokrátiku no ho órden hatudu katak povu Timor-Leste hakarak tebes moris iha ambiente pás, trankuilidade no estabilidade, tanba ambiente ida-ne’e mak Lú Olo sempre promove no tanen iha ninia mandatu nu’udar Prezidente Repúblika.

Lú Olo saúda kandidatu Prezidente Repúblika 2022-2027 na’in-15 sira seluk ne’ebé esforsu-an atu kampaña eleitoral ne’ebé hahú hala’ao iha 02 marsu to’o 16 marsu 2022 ne’e la’o iha ambiente hakmatek to’o loron votasaun.

Agradese ba esforsu tomak husi Tribunál Rekursu ba prosesu verifikasaun kandidatura, órgaun  eleitorál STAE no CNE,  no mós hosi ema hotu ne’ebé partisipa  iha prosesu eleitorál hanesan fiskais no observadór internasionál ho PNTL ne’ebé mantein orden di’ak  iha teritóriu tomak.

Iha eleisaun prezidensiál 2022 ne’e, kandidatu PR na’in-16 mak hadau malu atu manán konfiansa hosi povu ne’ebé ba totál votu válidu provizóriu STAE fó  ona, kandidatu na’in-rua  mak manán votu barak liu maibé la liu 50%+1.

Tuir lei, kandidatu PR na’in-rua ne’e mak sei kompete malu iha eleisaun demokrátika daruak (eleisaun segunda volta) ne’ebé tuir planu sei realiza 19 abril 2022, nune’e fiar katak sei tama iha segunda kampaña ho ambiente hanesan kampaña daruak no ida-ne’e mak vontade povu Timor-Leste tenke haksolok.

Iha segunda kampaña ne’e, kandidatu PR ida-idak bele hato’o sira-nia nia kompromisu loloos ba povu nu’udar Prezidente Repúblika, hodi hato’o liafuan ne’ebé sei hasa’e atu manán konfiansa povu nian tenke halo ho maturidade polítika no seriedade.

Enkuantu, iha eleisaun primeiru volta, kandidatu hosi partidu Fretilin ne’e hetan votu barak liu okupa iha pontu daruak hamutuk 143.408 (22,16%), hosi totál votu válidu hamutuk 647.172 iha territóriu nasionál.

Bazea ba rezultadu ikus ne’ebé Sekretariadu Tékniku Administrasaun Eleitorál (STAE) fó sai, Kandidatu Prezidente Repúblika (PR) hosi CNRT Jose Ramos Horta hetan votu 301,481 (46,58%), kandidatu PR hosi FRETILIN Francisco Guterres “Lu-Olo” hetan votu 143,408 (22,16%).

Kandidata hosi KHUNTO Armanda Berta dos Santos hetan votu 56,289 (8,70 %), kandidatu independente Lere Anan Timur hetan votus 48,959 votu (7,57%), kandidatu hosi PD Mariano Assanami Sabino hetan 47,008 votus (7,57%), kandidatu hosi PDRT Anacleto Bento Fereeira hetan 13,059 (2,02 %).

Kandidatu indendente Martinho da Silva Gusmao hetan votu 8,485 (1,31%), kandidatu independente Hermes da Rosa Correia Barros hetan votu 7,58 (1,23%), kandidata indendente Milena Pires hetan votu 5,335 (0,082%), kandidata independente Isabel da Costa Ferreira hetan votu 4,165 (0,64%).

Kandidatu independente Felizberto Araújo Duarte hetan votu 2,615 (0,40 %) Constancio Pinto hetan votus 2,474 (0,38%), kandidatu independente Rogerio Tiago Lobato hetan votu 2,028 (0,31%), kandidatu independente Virgílio da Silva Guterres hetan votu 1,685 (0,26%), kandidatu independente Antero Benedito hetan votu 1,531 (0,24 %) no kandidata independente Ángela Freitas hetan votu 692 (0,11%).

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here