Jestór Programa Nasionál TBC, Costantino Lopes. Imajen Tatoli//Filomeno Martins

DILI, 24 marsu 2022 (TATOLI) – Ministériu Saúde, liuhusi Unidade Programa Nasionál TB hala’o screening massal iha munisípiu Ataúro hodi komemora loron Mundiál TBC iha Timor-Leste.

Iha Screening Massla refere, Unidade TBC konsege deteta ema besik 100 iha Ataúro mak sofre moras TBC.

Jestór Programa Nasionál TBC, Costantino Lopes hateten eventu bo’ot ba komemorasaun Loron Mundiál TBC ba tinan ne’e sei hala’o iha Ataúro, iha loron sesta (25/03): “Ami hili Ataúro sai hanesan fatin ba selebrasaun Loron Mundiál TBC tinan ida ne’e, tanba Governu deklara ona katak Ataúro sei livre husi TBC iha 2024.”

Lopes haktuir, antes tama ba loron mundiál TBC, Unidade Programa Nasionál TBC serbisu hamutuk ho parseiru Klibur Domin hala’o screening ba populassaun iha Ataúro.

“Husi 11.000 poupulasaun iha Ataúro, ami halo screening ba ema 3.000-resin no ami kosege deteta ona ema kuaze 100 ida mak sofre moras TBC,” Nia esplika.

Nia salienta, antes ne’e Ataúro iha deit kazu TBC ida ka rua, maibe hafoin hala’o screening hatudu katak ema barak mak hetan ona moras TBC: “Ida ne’e signifika moras TBC espalla hela iha komunidade nia le’et. Ita hala’o screening semana tolu ona hahú husi fulan fevereiru.”

Iha komemorasaun refere, Unidade Programa Nasionál TB sei kupera ho Autoridade Munisípiu Ataúro hodi apoia Ekipa Task Force ne’ebé mak preparadu ona hodi hala’o atividade no programa tomak atu atinji meta ba eliminasain TBC iha 2024, iha Atauro.

Tuir nia, iha tinan 2020 no 2021, Ministériu Saúde rejista kazu TBC 3.000 itál: “Loloos ne’e ita tenke deteta kazu liu 6.000, maibé ita deteta de’it métade husi ne’e. Tanba situasaun Covid-19 hanesan implementasaun estadu emerjénsia, konfinamentu obrigatóriu no serka sanitária.

Nia dehan tuir dadus Organizasaun Mundiál Saúde (OMS), iha tinan 2020, rejista kazu 106 entre ema 100.000 iha Timor-Leste.

Hodi elimina TBC iha Timor-Leste, iha fulan setembru 2021, Primeiru Ministru, Taur Matan Ruak asina ona kompromisiu ida hodi sai nu’udar kompromisiu nasaun nian atu enkoraja parte hotu serbisu maka’as ba eliminasaun TBC iha 2025.

“La kle’ur tan ita mós estabelese Task Forse Nasional iha Dili hodi envolve parte hotu kombate TBC, tanba atu hapara TBC ita persiza Asaun Multisetorál,” nia haktuir.

Nia salienta katak atu kombate TBC iha Timor-Leste, la’ós de’it responsabilidade Ministériu Saúde nian, maibé persiza entidade hotu-hotu nia kontribuisaun hodi kombate moras TBC, tanba moras ne’e ema bolu moras multi-fatoriál.

Nia akresenta, Vise-Ministru Saude, Bonifácio Mau Coli dos Reis, Diretor Geral Servisu Saúde, no Diretór Nasionál Saude sira sei partisipa iha eventu refere.

Nune’e mós, atu komemora Loron Mundiál TBC iha Timor-Leste, MS koopera ho Catholic Relief Services (CRS) hanesan parseiru MS nian hodi selebra hamutuk Loron Mundáal TBC ho estudante sira iha Munisípiu Baucau, no selebra mós ho parte igreja nian iha Ermera.

Sensibilizasaun kombate TBC

Ministeriu Saúde, liu husi Unidade Programa Nasionál TB hala’o ona sensibilizasaun hodi hasa’e komunidade nia koñesimentu kona-ba prátika prevensaun no kontrolu TBC iha Timor-Leste.

“Ita monta billboard, no taka poster sira iha sentru saúde no klínika sira atu hasa’e komunidade nia koñesimentu kona-ba oinsá mak halo prevensaun husi moras TBC,” nia hatutan.

Nia dehan dijitál banner sira mós monta ona iha kada sentru saúde sira hodi eduka pasiente sira ne’ebé mak hala’o tratementu kona-ba prátika prevensaun moras TBC.

“Ami mós serbisu hamutuk parseiru rua hanesan Klibur Domin no Catholic Relief Services (CRS) hodi hala’o advokasia liuhusi rede katólika nian. Líder katólika ninia influénsia bo’ot tebes. Tanba ne’e mak envolvimentu igreja katólika nian importante tebes hodi kombate TBC iha Timor-Leste,” nia dehan.

Jestór Programa Nasionál TBC, Costantino Lopes husu komunidade atu hakbesik aan ba fasilidade saúde hodi hetan tratamentu karik iha sintomas hanesan me’ar liu semana rua, iis bo’ot, isin tuun, vontade han laiha.

“Diagnosa sedu di’ak liu hodi halo tratamentu ba moras TBC. Karik moras todan ona mak ba ospitál, entaun poténsia atu kura TBC ne’e ki’ik los,” nia esplika.

Nia hato’o katak, MS sei iha mós program tratamentu preventiva ba ema sira ne’ebe mak hela hamutuk ho maluk ne’ebé mak hetan ona moras TBC.

Related news:RAEOA konstrui klínika TBC separa atendimentu ba pasiente

Jurnalista: Filomeno Martins

Editór: Rafy Belo 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here