Autoridade Bobonaro hamutuk ho komunidade sira, kuda ai-oan iha aldeia Fatuk-boot, suku Leolima, postu administrativu Balibo, munisípiu Bobonaro. Imajen Tatoli/Sérgio da Cruz.

BOBONARO, 24 marsu 2022 (TATOLI) –  Autoridade Munisípiu ho komunidade munisípiu Bobonaro, kuda ai-oan hamutuk 1.500 iha aldeia Fatuk-Boot, suku Leolima, postu administrativu Balibo hodi proteje erozaun.

Atividade kuda ai-oan ne’e serbisu hamutuk entre autoridade munisípiu Bobonaro liuhosi Servisu Munisipál Água, Sanemanetu, Ambiente no Diresaun Servisu agrikultura munisipál, kuda ai-oan hamutuk 1.500 iha área manu-tén dodok, aldeia Fatuk-Boot, suku Leolima, postu adiministrativu Balibo munisípiu ne’e.

Atividade kuda ai-oan ne’e planu hosi departamentu ambiente nian hodi prevee $1.050 no servisu hamutuk ho Departamentu Reprezentasaun Territorál Florestál, Planta Indústria, no ai-oan hirak-ne’ebé kuda iha rai foho-lolon kuaze ektare ida-ne’e ho nia espésie haat mak kompostu hosi ai-hali, mahoni, suri, kakeu hodi koserva rai-halai.

Antes ne’e iha tinan 2004 liu ba parte florestál mós konsege kuda ai konservasaun ho epésie kakeu hamutuk 200 no ai-horis sira agora moris di’ak, maibé iha tempu udan, fatin ne’e sempre akontese dezastre tanba númeru ai-horis la sufisiente tanba kuda ho distánsia dook malu.

Xefe Departamentu Ambiente Munisipiu Bobonaro, Mário Barreto. Imajen Tatoli/Sérgio da Cruz.

“Atividade ida-ne’e, ami planeia dezde tinan kotuk kedas, ohin ita konsege realiza duni ho obetivu kuda ai-oan oinsá atu proteje rai halai no redús dezastre naturál, tanba iha fatin ne’e kada tinan sempre akontese rai-halai taka-metin estrada públiku diresaun Maliana ba Dili, entaun ita kuda besik malu tán atubele kaer rai metin,” Xefe Deprtamentu Ambiente Munisípiu Bobonaro, Mário Barreto, informa ba Agência  Tatoli, hafoin kuda ai-oan.

Diretór Servisu Agrikultura Munisípiu Bobonaro, Alberto Gomes Lopes, reforsa ba oin departamentu florestál planu iha fulan-jullu agora sei aumenta volume ai-oan tipu konservasaun kuda iha fatin refere  no fatin seluk atubele hametin aliserse rai nune’e bainhira tempu udan labele akontese tán dezastre naturál.

Diretór Servisu Agrikultura Munisípiu Bobonaro, Alberto Gomes lopes. Imajen Tatoli/Sérgio da Cruz.

Nia dehan, ba oin sei destaka guarda florestál hamutuk 14 atubele kontrola rútina ba viveiru hirak-ne’e, maibé presiza mós kontribuisaun hosi komunidade no autoridade lokál sira-nia atubele asegura viveiru hirak-ne’e nune’e asaun sira-ne’e bele iha ninia rezultadu pozitivu.

“Asaun ne’ebé ohin ita halo ne’e hodi hatudu ba komunidade sira katak pelumenus tinan ida ema ida kuda ai-oan ida, ne’ebé ha’u husu ba komunidade sira atu kuidadu ita-nia ai-horis sira-ne’ebá tanba ita-nia polítika estadu nia mós klaru ona, entaun ita labele tesi ai-oan sira-ne’e atubele moris iha ambiente ne’ebé di’ak,” nia katak.

Atividade kuda ai-oan ne’e partisipa mós funsionáriu sira hosi administrasaun munisípiu nian, diresaun servisu Ministériu Obra Públika Bobonaro, envolve mós estudante Tékniku Vokasionál númeru II, Malibaka, Yamato, Maliana no komunididade sira iha suku Leolima hamutuk 150-resin.

Jornalista   : Sérgio da Cruz

Editór         : Evaristo Soares Martins

 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here