iklan

NASIONÁL, HEADLINE, KAPITÁL

MTK-DNMG komemora loron mundiál meteorolojia ba dala-72 ho semináriu

MTK-DNMG komemora loron mundiál meteorolojia ba dala-72 ho semináriu

Diresaun Nasionál Meteorolojia no Jeofízika realiza mini semináriu, iha salaun MTK, Caicoli, kuarta (23/03). Imajen TATOLI/Francisco Sony

DILI, 23 marsu 2022 (TATOLI)—Ministériu Transporte Komunikasaun (MTK) liuhosi Diresaun Nasionál Meteoroljia no Jeofízika (DNMG, sigla portugés), kuarta ne’e, komemora loron mundiál meteorolójia ba dala-72 ho atividade semináriu.

Tema mundiál ba tinan ne’e mak ‘alerta antisipadu no asaun antisipadu’ ho sub-tema ‘informasaun idrometrolojia no klima ba redusaun klima dezastre’.

Diretór Jerál MTK, Gaspar de Araújo. Imajen TATOLI/Francisco Sony

Diretór Jerál Transporte Komunikasaun, Gaspar de Araújo, konsidera tema ne’e importante tebes ba liña setorál hotu inklui ba ema ne’ebé serbisu ba redusaun risku dezastre iha mundu, prinsipálmente Timor-Leste.

“Tanba ita hatene katak Timor-Leste mós sai hanesan nasaun ne’ebé vulnerável hetan ameasa kauza hosi mudansa klimátika hanesan udan boot, bailoron naruk no seluk tan, entaun liuhosi partilla informasaun ne’e importante tebes atubele minimiza redús risku dezastre naturál iha rai-laran,” Diretór Jerál Transporte Komunikasaun, hateten iha salaun MTK, Caicoli.

Notísia relevante: WFP konvida komunidade timor-oan harii reziliénsia ai-han ba mudansa klimátika

Tuir Gaspar de Araújo, semináriu ne’e atu konvida estudante, mídia no liña ministeriál hodi fahe informasaun relasiona ho previzaun tempu, hodi nune’e bele hatene informasaun didi’ak bainhira mosu dezastre naturál, bele salva-an.

Xefe Departamentu Meteorolojia DNMG Timor-Leste, Flaviana Fernandes. Imajen TATOLI/Francisco Sony

Iha fatin hanesan, Xefe Departamentu Meteorolojia DNMG Timor-Leste, Flaviana Fernandes, hateten, ohin komemora loron mundiál meteorolojia tanba iha loron 23 marsu 1950, Nasaun Unida forma ona ajénsia espesializada iha área meteorolojia naran Organizasaun Meteorolojia Mundiál.

“Selebrasaun ne’e hanesan eventu importante tebes ba ajénsia meteorolojia sira hotu iha mundu hodi bele partilla no jere informasaun ba malu relasiona ho mudansa atmósfera ne’ebé mak akontese iha mundu no fó impaktu ba idaidaik nia rai-laran rasik,” nia dehan.

Tinan ne’e Timor-Leste foin dahuluk selebra hola parte ba selebrasaun loron mundiál ba dala-72 tanba hola parte ona ba Organizasaun Mundiál Meteorolojia. 

Ajénsia sira ne’ebé serbisu hamutuk ho Governu Timor-Leste hodi haree ba redusaun risku dezastre naturál hanesan sistema alerta sedu mak United Nations Development Programme (UNDP) iha área Aileu, Ainaro no Dili.

Diresaun Nasionál Meteorolojia no Jeofízika realiza mini semináriu, iha salaun MTK, Caicoli, kuarta (23/03). Imajen TATOLI/Francisco Sony

“Ba oin ita hakarak tau iha munisípiu seluk. Tanba ne’e ita sei halo planu no koordenasaun di’ak ho parseiru internasionál sira hotu hanesan Organizational for Migration (IOM), Mercy Corps, no seluk tan, atu ajuda ita implementa sistema alerta sedu iha munisípiu hotu hodi redús risku dezastre,” nia akresenta.

Nune’e, DNMG iha meiu alerta ba dezastre naturál rasik hodi bele fó informasaun relasiona ho kondisaun tempu iha territóriu laran tomak.

“Informasaun sira durante ne’e DNMG prepara bazeia ba modelu meteorolójiku ne’ebé iha, ita halo análize no distribui ba komunidade liuhosi parseiru Sekretáriu Estadu Protesaun Sivil (SEPS) hodi haruka tutan ba sira-nia pontu fokál sira ne’ebé estabelese ona iha munisípiu sira hodi hatutan ba komunidade iha baze,” nia informa.

Jornalista : Arminda Fonseca

Editora      : Julia Chatarina

iklan
iklan

Leave a Reply

iklan
error: Content is protected !!