MSSI introdús matadalan subsídiu inan isin-rua ba autoridade komunitáriu Pássabe. Imajen Tatoli/Abílio Elo Nini.

OÉ-CUSSE, 23 marsu 2022 (TATOLI) – Ministériu Solidariedade Sosiál no Inkluzaun (MSSI), kuarta ne’e introdús matadalan programa atribuisaun subsídiu jerasaun foun bolsa da mãe, ba autoridade komunitáriu iha sub-rejiaun Pássabe, Rejiaun Administrativa Espesiál Oé-Cusse Ambeno (RAEOA).

Diretór Nasionál Dezastre Sosiál MSSI, Lucas Toiz, esplika ne’e foka liu ba implementasaun programa bolsa da mãe ba jerasaun foun bazea ba dekretu lei númeru 22/novembru 2021, ne’ebé Prezidente Repúblika promulga, ba MSSI ein-konjunta ho Ministériu Saúde (MS), atu hahú sensibiliza hodi implementa programa ne’e iha tinan 2022.

“Ita hahú sensibiliza tanba iha tinan ne’e Governu sei fó subsídiu ba inan isin rua, no labarik sira-ne’ebé idade infánsia, tán ne’e antes programa ne’e hahú presiza sensibiliza ba líder komunitáriu, atu komprende didi’ak nia prosesu implementasaun, nune’e bele komprende kontribui másima ba prosesu tomak, hahú fahe informasaun, rejistu no prosesu pagamentu,” Lucas Toiz, informa ba Agência Tatoli iha suku Abani, sub-rejiaun Pássabe.

Programa ne’e, atu investe liu ba inan isin-rua atu hadi’a sira-nia saúde, ho labarik idade infánsia atu hadi’a sira-nia saúde no nutrisaun, iha objetivu tolu, primeiru liuhosi subsídiu ne’e bele redusaun probreza, promove nutrisaun ba inan isin-rua no oan, nomoos sei kontribui ba dezenvolvimentu ekonomia lokál liuhosi subsídiu ne’e.

“Bolsa da mãe ba jerasaun foun hanesan programa pilotu ida, munisipiu tolu mak sai alvu faze dahuluk, hosi munisípiu Ainaro, Bobonaru no Rejiaun Administrativa Espesiál Oé-Cusse Ambeno, tanba dadus Ministériu Saúde (MS) iha 2020 hatudu, labarik raes barak, hosi otas fulan 0-59 iha munisípiu Ainaro atinje 60%, Bobonaro atinje 53,3% no iha RAEOA atinje 57,1%, tán ne’e polítika VIII Governu kria programa ne’e atu investe subsídiu atu estabelese sistema asisténsia sosiál ba jerasaun foun,” nia katak.

Purtantu, programa ne’e realiza hafoin finaliza sensibilizaun no sei hetan lansamnetu ofisiál hosi membru Governu molok implementa iha munisípiu tolu ne’e, no programa ne’e nia valór orsamentu difeferente ho bolsa da mãe atuál, ba inan isin-rua nia valór sei hetan $15 kada fulan to’o partu, no bainhira bebé moris to’o tinan tolu (3), nia sei hetan $20 kada fulan, no inan sei la hetan ona, maibé bebé mak sei hetan durante tinan neen (6).

Entretantu, subsidiu ne’e iha tipu rua, ida subsidiu gravides ba inan isin-rua atubele proteje feto-sira durante períodu grávida, no subsídiu ba labarik atribui ba labarik ho idade 0-3, kontinua to’o idade tinan neen (6), atu proteje labarik-sira iha tempu dezenvolvimentu infánsia, atu aumenta mós suplementu adisionál ba labarik sira ho moras króniku ka defisiénsia.

Programa MSSI ne’e serbisu hamutuk ho Ministériu Saúde (MS) no Governu Austrália liuhosi Partnership Development Programme (PHD), ba sidadaun hotu-hotu bainhira isin-rua, presiza asesu fasilidade saúde hodi hetan atendimentu. Bainhira deteta ona katak, nia isin-rua, sei rejistu tama iha programa bolsa da mãe ba jerasaun foun.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here