Ministru Ensinu Superiór Siénsia no Kultura, Longuinhos dos Santos. Imajen TATOLI/Francisco Sony

DILI, 23 marsu 2022 (TATOLI)–Ministériu Ensinu Superior Siénsia no Kultura (MESSK) tinan ne’e sei halo alterasaun ba Lei Baze Edukasaun, atu bele loke oportunidade hasa’e grau akadémiku iha Institutu Politékniku Betanu (IPB).

“IPB iha ona grau akadémiku diploma II, tanba ne’e ita-nia planu atu hasa’e tan sira-nia grau akadémiku ba diploma III hodi loke tan espasu ba estudante sira,” Ministru Ensinu Superiór Siénsia no Kultura, Longuinhos dosa Santos, hateten iha Palásiu Governu, kuarta ne’e.

Notísia relevante: Kandidatu 6.352 admitidu ba UNTL no IPB tinan akadémiku 2022

Tuir Ministru, MESSK halo ona esforsu no daudaun iha ona proposta ne’ebé tama ona iha planu lejizlasaun nian atubele aprezenta, ho nune’e kuandu iha posibilidade bele halo mudansa grau akadémiku.

“Ita iha esforsu ne’ebé atu ezerse iha tinan ida-ne’e maka atu hasa’e grau akadémiku ba IPB, maibé presiza mós halo alterasaun lei ida hodi reforsa baze edukasaun iha Instituisaun Ensinu Superiór nia laran,” nia tenik.

Iha sorin seluk, Ministru nota mós katak estudante baxarelatu 2.000 resin hosi Instituto Nacional de Formação de Docentes e Profissionais da Educação de Timor-Leste (INFORDEPE) prontu ona atu gradua, maibé MESSK seidauk fó sai despaixu graduasaun.

“Ita to’o agora seidauk simu dokumentu ruma hosi INFORDEPE ka Universidade Nasionál Timor-Lorosa’e (UNTL) kona-ba dadus estudante ne’ebé atu gradua,” nia akresenta.

Notísia relevante: INFORDEPE prepara vaga 1.200 grau baxarelatu ba profesór permanente

Tuir governante ne’e, universidade ida bainhira atu fó graduasaun ba ninia estudante finalista sira tenke iha lista no relatóriu anuál ne’ebé tenke submete ba MESSK, atu nune’e molok to’o prosesu graduasaun ministériu bele fó sai despaixu graduasaun.

IPB nu’udar instituisaun autónomu ne’ebé goza ninia fundu rasik, ne’ebé ba futuru sei sai instituisaun ida modernu no kualidade.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here