DILI, 23 marsu 2022 (TATOLI)— Diretór Ezekutivu Klínika Bairru Pité (KBP), Inacio do Santos, informa hahú hosi janeiru to’o fevereiru, rejista pasiente tuberkuloze na’in- 80-resin, hosi númeru ne’e na’in-rua mate.
“Iha fulan janeiru, ita rejista pasiente tuberkuloze 40-resin no fevereiru iha pasiente 39 inklui pasiente ne’ebé nia kaben tasak halo ona diagnostika iha janeiru na’in-27 no fevereiru na’in- 15 ne’ebé halo izolamentu iha Tibar atu labele hadaet ba ita- nia populasaun sira seluk,” Diretór Ezekutivu ne’e, hateten ba jornalista sira iha knaar fatin, kuarta ne’e.
Notísia relevante: Klínika Bairru-Pité rejista pasiente tuberkuloze 333, óbitu na’in-rua
Daudaun, KBP hala’o tratamentu ativu ba pasiente na’in-200-resin ne’ebé hahú simu ona aimoruk hosi fulan-outubru no novembru iha tinan 2021.
Alende ne’e, Klínika refere mós rejista pasiente ne’ebé lakon ona hosi tratamentu ativu iha 2020 ho 15%.
“Maibé to’o agora Klínika Bairru-Pité menus finanseiru no servisu hamutuk ho Fundu Globál no iha tinan 2021 ne’e laiha kazu drop out, nune’e espera iha tinan 2022 ne’e kazu drop out laiha nafatin,” nia akresenta.
Nune’e, Klínika Bairru Pité iha kompromisu atu kontinu servisu hamutuk ho Governu liuhosi Ministéiru Saúde hodi elemina moras tuberkuloze iha Timor-Leste.
“Ita fó hanoin ba profisionál saúde no mós komunidade sira atu haree ba asuntu ne’e bainhira iha ona moras ba tuberkuloze lalais ba fasilidade saúde hodi halo prevensaun sedu, nune’e labele da’et tutan ba ema ne’ebé mak besik,” nia rekomenda.
Notísia relevante: MS apoia mákina teste tuberkoluze ida ba Klínika Bairru-Pité
Jornalista : Felicidade Ximenes
Editór : Florencio Miranda Ximenes
