Kandidatu Prezidente Repúblika independente períodu 2022-2027, Constâncio Pinto ‘Terus’. Imajen TATOLI/Anito Soares

DILI, 25 marsu 2022 (TATOLI)—Kandidatu Prezidente Repúblika (PR) independente ba períodu 2022-2027, ho númeru sorteiu 11, Constâncio Pinto ‘Terus’, hateten, nia parte hetan ona kontaktu hosi kandidatura Francisco Guterres ‘Lú Olo’, ligadu ho apoiu polítiku bainhira hakat ba eleisaun segunda volta.

“Ha’u hetan aprosimasaun hosi Kandidatu Prezidente Repúblika Lú Olo, enkuantu Ramos Horta seidauk, maibé ha’u-nia parte seidauk foti desizaun ruma atu apoiu entre kandidatu rua ne’e, tanba ha’u hanesan kandidatu indepedente, entaun ha’u sei koordena ho ha’u-nia koordenadór sira hosi munisípiu mak foin foti desizaun,” Constâncio Pinto hateten ba Agência TATOLI, via telefónika, sesta ne’e.

Notísia relevante: Constâncio Pinto: “La eleitu ba Prezidente Repúblika, ha’u kontinua serbí nasaun”

Bazeia ba atualizasaun apuramentu hosi rezultadu Eleisaun Prezidensiál 2022 primeira ronda iha 19 marsu, Kandidatu PR, José Ramos Horta hetan votu 301.815 (46,5%), enkuantu kandidatu Francisco Guterres ‘Lú Olo’ hetan votu 143.411 (22,1%), ne’ebé posibilidade kandidatu na’in-rua bele kompete iha eleisaun segunda volta.

Constâncio Pinto dehan, maski la hetan votu barak iha eleisaun tinan ne’e, maibé hanesan esperénsia ida ba nia atu tinan-lima mai bele prepara-an di’ak liután hodi kompete fali ho kandidatu seluk.

“Ha’u hanoin eleisaun tinan-ne’e maski ha’u lakon, maibé sai hanesan esperénsia ba ha’u oinsá atu prepara-an di’ak liután ba eleisaun iha futuru mai, nune’e ha’u hato’o parabéns mós ba kandidatu sira ne’ebé hetan votu maiória,” nia dehan.

Biban ne’e nia parte mós agradese ba vontante sira ne’ebé vota ona ba nia, maski la manán iha eleisaun tinan ne’e.

Antes ne’e, Constâncio Pinto rejista kandidatura iha Tribunál Rekursu ho proponente 5.000 resin.

Iha eleisaun primeira volta kandidatu indepedente ne’e hetan votu 2.513 (0,4%), hosi totál votu válidu hamutuk 648.557 (98.14%) iha territóriu tomak.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here