Kandidatu Prezidente Repúblika independente ba períodu 2022-2027, ho númeru sorteiu 12, Virgílio da Silva Guterres, hato’o kompromisu ba apoiante sira durante halo kampaña ho tipu diálogu, domingu (13/03) iha aldeia Ilimanu, Manatuto. Imajen TATOLI/Jogerjo Guterres

DILI, 22 marsu 2022 (TATOLI)—Kandidatu Prezidente Repúblika (PR) indepedente ba períodu 2022-2027, ho númeru sorteiu 12, Virgílio da Silva Guterres, agradese ba votante sira ne’ebé fó ona votu ba nia hamutuk 1.685 (0,26%).

“Kona-ba rezultadu, molok iha votasaun ha’u otimista, tanba bainhira tama konkorénsia ita tenke fiar katak manán, maibé tenke mós realista no agradese ba konfiansa votu ne’ebé fó mai ha’u hosi votante sira. Ha’u konsidera votu sira ne’e kualidade duni no refleta duni sira-nia apoiu ba hanoin ne’ebé ha’u fó sai iha kampaña no diálogu, ne’ebé hateten atu lori mudansa ba rai ida-ne’e. Entaun ha’u apresia votu sira ne’e,” Virgílio Guterres hateten ba Agência TATOLI, iha Fundasaun Haburas, Farol, tersa ne’e.

Notísia relevante: Virgílio Guterres iha kompromisu tolu bainhira eleitu sai Prezidente Repúblika

Aleinde ne’e, nia sente orgullu tanba bele partisipa iha  konkorénsia polítika hamutuk ho kandidatura seluk no bele reprezenta jerasaun foun hato’o ba públiku no líder jerasaun uluk katak jerasaun foun prontu atu lidera rai ida-ne’e no povu atu hateke ba oin.

Bazeia ba atualizasaun apuramentu ikus hosi Sekretariadu Tékniku Administrasaun Eleitorál (STAE), hatudu kandidatura rua hetan votu barak liu hanesan José Ramos Horta ho númeru sorteiu 14 ho votu 301.481 (46,58%) no Francisco Guterres ‘Lú Olo’ ho númeru sorteiu 06 ho votu 143.408 (22,16%), ne’ebé posibilidade kandidatura rua ne’e kompete iha eleisaun segunda volta.

“Ha’u fó parabéns ba kandidatu na’in-rua ne’ebé hetan votu maioria iha elisaun tinan-ne’e, ba ha’u iha eleisaun ida-ne’e laiha manán ka lakon, kapasidade atu konkista povu nia fiar mak seidauk natón tanba kandidatu indepedente ho rekursu ne’ebé menus la hanesan kandidatu sira seluk ne’ebé iha mákina eleitorál no mós iha osan atubele la’o,” nia hateten.

Virgílio orgullu mós tanba ámbitu eleisaun bele iha oportunidade la’o haleu hasoru komunidade hodi haree katak dezenvolvimentu tinan-20 ne’e seidauk to’o iha populasaun no koñese di’ak liután situasaun komunidade iha área rurál inklui bele hato’o ba públiku no líder jerasaun uluk katak, jerasaun foun prontu atu kontinua.

“Kona-ba apoiu ba kandidatu ruma, ha’u bele ko’alia bainhira ha’u-nia votu ne’e iha númeru persentajen boot signifikante mak halo ema ruma manán ka halo lakon ema ruma, tanba ha’u-nia votu ho de’it 2.474 (0,26%) kiik loos, ne’ebé ha’u hato’o ba públiku liuliu ema sira ne’ebé vota ba ha’u, atu kontinua vota iha segunda volta, maibé tenke vota ho konsiénsia,” nia dehan.

Ba Virgílio, apoiante sira iha liberdade atu hili Prezidente Repúblika ne’ebé sira fiar katak bele reprezensa aspirasaun polítika, tanba durante kampaña mós nia ko’alia kona-ba vota ho konsiénsia, entaun nia sei la obriga apoiante sira atu tenke vota tuir nia hakarak.

Iha sorin seluk, nia husu kandidatura rua ne’ebé sei kompete iha eleisaun segunda volta atu para ho vigansa polítika no ódio malu.

“Tenke promove diálogu atu nune’e bele restaura ita-nia sosiedade atu armoniza,” Virgílio tenik.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here