Eleitór balun iha Sentru Votasaun Paralelu Eskola Tékniku Vokasionál (STM) Becora lamenta ho prosesu votasaun ne’ebé realiza, tanba sira ninia naran la sai iha fatin refere. Foto Tatoli/Cidalia Fatima.

DILI, 22 marsu 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE sei la halo atendementu foun ba eleitór ne’ebé atu vota iha sentru votasaun paralelu iha eleisaun segunda volta.

Notísia Relevante: Eleitór balun lamenta naran la sai iha sentru votasaun paralelu STM

“Bainhira hakat ba segunda volta, STAE nia pozisaun la’o tuir saida mak lei hateten iha regra sira, entaun ita mós sei aplika sitausaun hanesan karik akontese segunda volta. Iha lei no regulamentu sira mós hateten katak sira-ne’ebé mak ezerse iha segunda volta ne’e ba eleitór ne’ebé eleisaun dahuluk nian, nune’e ita sei la halo atendimentu foun ba eleitór sira-ne’ebé hakarak halo hodi vota iha sentru votasaun paralelu nian,” Acilino Manuel Branco hateten ba jornalista sira bainhira partisipa plenária iha CNE ba abertura apuramentu nasionál, segunda ne’e.

Nia husu ba eleitór hotu-hotu atu vota iha ida-idak nia suku ka moris fatin no sira-ne’ebé rejistu ona iha sentru votasaun paralelu iha Dili nafatin vota iha sentru votasaun paralelu, katak sira-ne’ebé antes ne’e vota ona iha eleisaun ronde dahuluk ne’e.

“Ita husu ba eleitór sira-ne’ebé rejistu ona iha sentru votasaun paralelu nian atu labele vota fali iha ita-boot nia moris fatin, tanba ita-nia naran tama ona iha lista sentru votasaun paralelu nian. Karik ita ita-boot sira mak ba fatin orijin ita sei la vota tanba naran ita dezativa tiha hosi sistema,” nia esplika.

Diretór ne’e informa, kazu hanesan ne’e akontese iha Munisípiu Lautém, Bobonaro, Covalima no Viqueque, nune’e bele mós akontese iha munisípiu seluk.

“Tanba ne’e ita sei laiha tan rejistu iha paralelu no ita mós sei kolabora ho ita-nia brigada, autoridade komunitária inklui jornalista sira atu informa ba sidadaun sira iha neste momentu ho kartaun eleitorál unidade jeográfika ida-idak nia suku no Munisípiu, atu prepara-an hodi vota iha ida-idak nia suku orijin karik akontese segunda volta,” nia hateten.

Ho ida-ne’e, STAE kontinua halo preparasaun feitu bainhira akontese eleisaun segunda volta entermu lojistikamente preparadu atu fasilita eleisaun segunda volta.

Notísia Relevante: Eleitór la vota iha sentru votasaun paralelu tanba la rejista iha STAE

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here