Diretór Eskola EBC Bidau Akadiruhun, Mateus Pinto Tilman. Imajen TATOLI/Tomé Amado

DILI, 22 marsu 2022 (TATOLI)Prosesu reabilitasaun sala aula haat iha Eskola Ensinu Báziku Sentrál (EBC, sigla portugés) iha Bidau Akadiruhun, ne’ebé tama projetu komunitária hosi Ministériu Edukasaun Juventude no Desportu (MEJD) daudaun atinje ona 20%.

Eskola ne’e benefisia programa projetu komunitária hodi reabilita sala aula hitu no sintina ida ho kustu projetu $93.300 resin.

Diretór EBC Bidau Akadiruhun, Mateus Pinto Tilman, hateten prosesu reabilitasaun la’o ona, iha sala haat maka badaen sira sobu ona, sala rua taka ona kalen, sei falta sala rua maka seidauk.

“ita bele dehan sala rua taka ona kalen ne’e atinje ona 20%, aban ka bainrua maka tau tan plafon bele sa’e ona ba 25%. Agora ba sala rua seluk foin maka hasai kalen no hamoos, ba oin kuandu taka tan kalen bele atinje ona 45% to’o 50%,” Mateus Pinto informa ba Agência TATOLI, iha eskola EBC Bidau Akadiru-hun, tersa ne’e.

Notísia relevante: Eskola EBC Bidau Akadiruhun hahú ona prosesu reabilitasaun sala rua

Maski prosesu reabilitasaun iha eskola la’o daudaun, maibé la prejudika atividade ensinu aprendizajen estudante sira, tanba eskola prepara ona sala provizória haat ba estudante hetan matéria.

“Sala provizória sira ne’e eskola prepara iha varanda eskola, tanba ne’e ami-nia estudante hamutuk 200 la lakon direitu atu hetan matéria, maibé oras maka ami hamenus tanba kondisaun matéria ne’ebé estudante sira la hetan ami deside tau fali ba loron tuir mai,” nia akresenta.

Tuir Responsável eskola, falta tan sala seluk seidauk book, kuandu sobu hotu ona eskola tenke kria tan sala provizória haat ba estudante sira, ne’ebé ho volume estudante bele sa’e ba 400.

Iha sorin seluk, bazeia ba observasaun Jornalista Agência TATOLI iha terrenu, nota katak durante prosesu reabilitasaun eskola, badaen sira halo ezersísiu maka’as atu aselera prosesu reabilitasaun, nune’e bele garante labarik sira bele hetan filafali fatin seguru ba prosesu ensinu aprendizajen.

Eskola EBC Bidau Akadiruhun iha sala aula 14, ho estudante pur volta 1.400, ne’ebé kada sala aula bele akumula estudante kuaze 60.

Antes ne’e, MEJD hamutuk ho Diretór eskola hosi 12 munisípiu asina kontratu ba implementasaun konstrusaun no reabilitasaun infraestutura eskola hamutuk 197 iha territóriu nasionál, liuhosi projetu komunitáriu, ne’ebé hosi númeru ne’e, iha Dili iha eskola 16 ho sala 64, ho kustu $1.680.680,12.

Jornalista : Tomé Amado   

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here